Kuri uyu wa Gatandatu muri Cameroun hatangiye isiganwa rizwi nka “Tour du Cameroun”, isiganwa ryanatumiwemo ikipe y’igihugu y’umukino w’amagare (Team Rwanda).
Ni irushanwa ryatangiye kuri uyu wa gatandatu, aho abasiganwa bazengurukaga umujyi wa Doula ku ntera ya Kirometero 123,8.
Umunya-Cameroun Artuce Tella ukinira ikipe ya SNH Velo Club Cameroun niwe wabaye uwa mbere, akoresheje amasaha 2, iminota 51 n’amasegonda 33. Ku mwanya wa kabiri haje Munyaneza Didier ukinira ikipe y’igihugu y ‘u Rwanda, arushijwe amasegonda 41. Daumont Paul ukinira ikipe y’igihugu ya Burkina Faso yabaye uwa gatatu, nawe anganya ibihe na Munyaneza.
Abandi banyarwanda baje hafi ni Mugisha Moise waje ku mwanya wa 9 arushwa iminota 5 n’uwa mbere, Tuyizere Etienne aza ku mwanya wa 14 arushwa iminota 5 n’amasegonda 11 n’uwa mbere, Nzafashwanayo Jean Claude aza ku mwanya wa 16, Niyonkuru Samuel aza ku mwanya wa 24 naho Muhoza Eric aza ku mwanya wa 24 ariko bose banganya ibihe na Tuyizere Etienne.
Kuri iki cyumweru abakinnyi barasiganwa agace kabo ka kabiri aho bari buhagurukire Yaounde berekeza muri Ayos, rukaba ari urugendo rwa Kirometero 118,8.
