Guverinoma y’u Bufaransa yashyize hanze itangazo ivuga ishimira icyemezo cya Perezida wa Repubulika Iharanira Demokarasi ya Congo, Felix Tshisekedi wemeye ko hategurwa ibiganiro byo ku rwego rw’Igihugu bihuza impande zose.
Iri tangazo rya Guverinoma y’u Bufaransa, ryashyizwe hanze kuri uyu wa Mbere tariki 27 Nyakanga 2026, nyuma yuko Tshisekedi yakiriye abayoboze mu madini n’amatorero, akemera ko hagomba kubaho ibiganiro byakunze gusabwa n’abo mu ihuriro rirwanya ubutegetsi bwa Congo.
Mu itangazo ryashyizwe hanze na Guverinoma y’u Bufaransa, iki Gihugu cyavuze ko cyishimiye ibiganiro byemejwe na Perezida Tshisekedi.
Muri iri tangazo, u Bufaransa bwavuze ko “Burashimira itangazwa ryakozwe na Perezida Tshisekedi ryo gutegura ibiganiro byo ku rwego rw’Igihugu bihuza impande zose, bizitabirwa n’abahagarariye imiryango y’amadini n’amatorero ndetse n’abaterankunga bo mu karere.”
U Bufaransa bukomeza bugira buti “Ishyirwa mu bikorwa ry’ibi biganiro nirikorwa neza, rizagira uruhare mu kugarura ubumwe bw’Igihugu, mu rwego rwo kubahiriza ubusugire bwa DRC.”
Iki Gihugu cyo ku Mugabane w’u Burayi, kandi kivuga ko kwemera ibi biganiro bizahuza Abanyekongo, bigaragaza ubushake bw’ubutegetsi bwa Congo mu gushaka umuti ushingiye wa politiki n’amahoro arambye mu karere k’Ibiyaga Bigari.
U Bufaransa kandi buvuga ko intego yo gukomeza kugarura ubumwe bw’Igihugu, mu kubaha inzego n’Itegeko Nshinga, bizagira uruhare mu gukomeza inzira y’ubuhuza buyoborwa na Leta Zunze Ubumwe za America, Qatar n’Umuryango wa Afurika Yunze Ubumwe, bunavuga kandi ko na bwo bushyigikiye iyi nzira.
U Bufaransa bushimye iki cyemezo cya Guverinoma ya Congo cyo kwemera ibiganiro, nyuma yuko u Bubiligi na bwo bushimiye iki Gihugu kuba cyemezo iyi nzira.
Abahagarariye amadini bari mu bagize Ihuriro C64 ritavuga rumwe n’ubutegetsi bwa Tshisekedi, baherutse kwemerera Perezida Evariste Ndayishimiye wabasabye kuzayoboka inzira y’ibiganiro mu gushaka umuti w’ibibazo biri muri Congo.
Aba batavuga rumwe n’ubutegetsi buriho muri Congo, bavuga ko badakozwa umugambi wo kuvugurura Itegeko Nshinga wazamuwe na Perezida Tshisekedi ngo bizamucire inzira yo kuguma ku butegetsi.
RADIOTV10