Intambara iri kubera muri Repubulika Iharanira Demokarasi ya Congo yongeye gukara nyuma yuko yubuye hagati y’umutwe wa M23 n’indi mitwe ibiri ifatanya na FARDC, yasize M23 yigaruriye akandi gace.
Iyi mirwano yongeye kugaragaza ingufu zidasanzwe kuva mu ntangiro z’iki cyumweru, byumwihariko kuri uyu wa Kabiri, tariki 28 Werurwe 2023.
Umutwe wa M23 wakunze kuvuga ko urwana ari uko wagabweho ibitero n’igisirikare cya Repubulika Iharanira Demokarasi ya Congo (FARDC), gifatanyije n’imwe mu mitwe yitwaje intwaro irimo uwa FDLR uhungabanya umutekano w’u Rwanda.
Kuri uyu wa Kabiri urugamba rwongeye kwambikana, nyuma yuko imwe muri iyi mitwe iri guha ubufasha FARDC igabye igitero ku barwanyi b’umutwe wa M23, igasanga baryamiye amajanja baniteguye guhangana.
Amakuru aturuka muri Repubulika Iharanira Demokarasi ya Congo, avuga ko uru rugamba rwabaye kuri uyu wa Kabiri, rwagejeje ku mugoroba rugihinanye, rukarangira M23 yigaruriye umujyi wa Bihambwe.
Uyu mujyi wa Bihambwe uri mu bilometero bitatu (3) uvuye mu gace gakungahaye ku bucukuzi bw’amabuye y’agaciro ka Rubaya kari muri Teritwari ya Masisi mu Ntara ya Kivu ya Ruguru, watangiye kungenzurwa na M23 kuva ku isaha ya saa kumi n’ebyiri (18:00’) z’umugoroba wo kuri uyu wa Kabiri.
Umutwe wa M23 wafashe aka gace ka Bihambwe nyuma y’imirwano ikomeye yawuhanganishije n’imitwe ibiri ya Nyatura na Maï-Maï.
RADIOTV10
