Polisi yo muri Afurika y’Epfo ikurikiranye umugabo ucyekwaho gukwirakwiza amashusho y’urukozasoni harimo isura ya Perezida w’Igihugu, Cyril Ramaphosa.
Kuri uyu wa Kabiri byari biteganijwe ko uyu mugabo ashyikirizwa ubutabera i Pretoria ngo yiregure ku byo akurikiranyweho byo gukwirakwiza amashusho y’urukozasoni kandi y’impimbano arimo Umukuru w’Igihugu.
Polisi ivuga ko uyu mugabo w’imyaka 34 y’amavuko yakwirakwije aya mashusho ku bapolisi batandukanye ndetse no ku mbuga nkoranyambaga.
Iperereza ryatangiye gukorwa kuri uyu mugabo muri uku kwezi kwa Gicurasi aribwo yaje gufatirwa mu burasirazuba bw’iki Gihugu cya Afurika y’Epfo, atabwa muri yombi.
Hagati aho amashusho y’urukozasoni n’ibikorwa nkabyo birabujijwe muri Afurika y’Epfo kimwe no kubikwirakwiza.
Denyse MBABAZI MPAMBARA
RADIOTV10