Ikipe ya Paris Saint Germain yananiwe kugera ku mukino wa nyuma wa UEFA Champions League, nyuma yo gusezererwa na Borussia Dortmund yo mu Budage.
Ni nyuma y’uko umukino wo kwishyura wabaye mu ijoro kuri uyu wa Kabiri tariki 07 Gicurasi 2024, Borussia Dortmund isubiriye PSG imbere y’abafana bayo mu Bufaransa, ikayitsinda igitego 1-0 cyaje gikurikira icyo yayitsinze mu mukino ubanza.
Ni igitego cyatsinzwe na Hummels ku munota wa 77’, ari na cyo rukumbi cyabonetse muri uyu mukino wagoye ikipe ya PSG yari iri imbere y’abafana bayo bayisabaga ibigoye.
Borussia Dortmund yari imaze imyaka 11 idakandagira ku mukino wa nyuma wa UEFA Champions League, dore ko yawuherukagaho mu mwaka wa 2013.
Kuri uyu wa Gatatu tariki 08 Gicurasi, Dortmund iramenya ikipe bizahurira ku mukino wa nyuma, nyuma y’umukino uza guhuza Real Madrid na Bayern Munich i Santiago Bernabeu, aho umukino ubanza wari wararangiye amakipe yombi anganya ibitego 2-2.
Jean Claude KANYIZO
RADIOTV10
