Intumwa z’Ubuyobozi bw’Ingabo z’u Rwanda ziyobowe n’Umugaba Mukuru wazo, General Mabarakh Muganga zitabiriye imyitozo ikomatanyije ya gisirikare y’iminsi ibiri iri kubera muri Türkiye, irimo iyo kurashisha indege za gisirikare ndetse n’iy’urugamba rwo mu mazi.
Amakuru dukesha Ubuyobozi bw’Ingabo z’u Rwanda, yatangajwe kuri uyu wa Kane tariki 30 Gicurasi 2024, avuga ko “Intumwa za RDF ziyobowe n’Umugaba Mukuru, Gen MK Mubarakh, bitabiriye EFES-2024, imyitozo y’Ibihugu bitandukanye iyoborwa na Türkiye, irimo iyo kurasa imbonankubone.”
Iyi myitozo iri kubera ahitwa Izmir muri Türkiye, yatangiye kuri uyu wa Gatatu tariki 29 kugeza none ku wa Kane tariki 30 Gicurasi 2024.
Iyi myitozo igamije gufasha Ibihugu bitandukanye kureba ubushobozi bw’Igisirikare cya Türkiye, ndetse n’ikoranabuhanga rigezweho kifashisha kuva ku ndege zitagira abapilote zizwi nka Drone kugera ku ndege za kajugujugu za gisirikare, ndetse n’amato y’intambara, n’uburyo bw’indebakure bwifashishwa mu rugamba.
Iyi myitozo y’uyu mwaka, izagaragaramo abazayitabira b’abanyamahanga barenga 1 500 bo mu Bihugu 50, ndetse hamwe n’ab’igisirikare cya Türkiye, kimwe n’abazayitabira bayikurikira, ikaba yari yitezwemo abantu ibihumbi 11.
RADIOTV10
