Ihuriro AFC/M23 ryemeje ko ryakoze igikorwa cyo gusenya ahategurirwaga ibitero by’indege zitagira abapilote z’igisirikare cya FARDC ku Kibuga cy’Indege cya Kisangani, byari bikomeje kwifashishwa mu kugaba ibitero muri bimwe mu bice byabohowe n’iri Huriro.
Bikubiye mu itangazo ryashyizwe hanze n’Umuvugizi wa AFC/M23 mu bya politiki, Lawrence Kanyuka mu gitondo cyo kuri uyu wa Gatatu tariki 04 Gashyantare 2026.
Kanyuka avuga ko ibi bitero byabaye hagati ya kuwa Gatandatu, tariki ya 31 Mutarama, na Ku Cyumweru, tariki ya 1 Gashyantare 2026, byari bigamije gusenya ahategurirwa ibitero bya gisirikare by’indege zitagira abapilote za FARDC.
Kanyuka ati “Iki kigo cyari uburyo bw’ingenzi bwo gutegura, guhuza no gushyira mu bikorwa ibikorwa byica abaturage n’ibirindiro bya AFC/M23 mu turere twabohowe, harimo Masisi, Walikale, Rutshuru, Lubero, Kalehe, Mwenga, na Minembwe.”
Avuga ko iki gikorwa cyaje gikurikira ibikorwa by’ubwicani byinshi byari bimaze iminsi bikorwa n’uruhande bahanganye rw’abarwanirira ubutegetsi bwa Kinshasa, ndetse ko byari byagaragajwe kenshi mu nyandiko no mu mashusho. Ati ” Ikibabaje ni uko iyo miburo ndetse no gutakamba, kwirengagijwe mu buryo bukomeye.”
Umuvugizi wa AFC/M23 akomeza avuga ko iri Huriro ritazigera ryihanganira cyangwa ngo rirebere mu gihe abaturage b’inzirakarengane bazaba bakomeje kwicwa urw’agashinyaguro.
Yavuze kandi ko iri Huriro riha umuburo ubutegetsi bwa Congo ko “igihe buzakomeza gukora ibyaha, AFC/M23 izakora ibishoboka byose kugira ngo iburizemo ibyo bikorwa ibisanze aho bitegurirwa.”
Kanyuka agakomeza agira ati “AFC/M23 irahamagarira ubutegetsi bwa Kinshasa gukora amahitamo mazima hagati y’amahoro n’intambara. Niba buhisemo amahoro, bugomba kubahiriza mu buryo bwuzuye agahenge. Niba buhisemo intambara, bugomba kuzirengera ibyo bwahisemo n’ingaruka zizakomeza kubaho.”
Nanone kandi iri Huriro ryasabye ubutegetsi bwa Congo guhagarika ibikorwa byo kujya kuzana hanze ababukorera muri ibi bikorwa bihitana Abanyekongo b’inzirakarengane.
Kanyuka yakomeje agira ati “Igitero cyagabwe i Kisangani cyakozwe n’igisirikare cya AFC/M23. Ubutegetsi bwa Kinshasa buzirikane ibikoresho bya gisirikare bwataye ku Bibuga by’Indege bya Goma na Kavumu, kandi nanone bugomba kumva ko gukoresha drone cyangwa abacancuro atari umwihariko wagenewe Kinshasa gusa.”
Asoza avuga ko AFC/M23 imenyesha umuryango mpuzamahanga ko itazabura kugira icyo ikora mu maguru mashya mu guhagarika ibikowa bibi nka biriya by’ubutegetsi bwa Congo.
RADIOTV10
