Intumwa z’Ingabo za Uganda (UPDF) ziri mu Rwanda, ziri kumwe n’abayobozi mu Ngabo z’u Rwanda bakorera ku Mupaka uhuza ibi Bihugu byombi, basuye Ikigo cya Mutobo gishinzwe gusubiza mu buzima busanzwe abari abasirikare mu mitwe yitwaje Intwaro barimo n’abavuye muri FDLR.
Ni igikorwa cyabaye kuri uyu wa Kane tariki 19 Gashyantare 2026 nk’uko byatangajwe n’Ubuyobozi Bukuru bw’Ingabo z’u Rwanda.
Ubuyobozi bwa RDF, buvuga ko “Intumwa zaturutse mu Ngabo za Uganda (UPDF), ziri kumwe n’abayobozi mu Ngabo z’u Rwanda (RDF) bakorera ku mupaka uhuza u Rwanda na Uganda, basuye Ikigo cya Mutobo gishinzwe gusubiza mu buzima busanzwe abari abasirikare mu mitwe yitwaje intwaro, giherereye mu Karere ka Musanze.”
Ni uruzinduko rwari rugamije kumenya no gusobanukirwa gahunda n’ibikorwa bifasha mu gusubiza mu buzima busanzwe abahoze ari abarwanyi b’umutwe wa FDLR n’indi mitwe yitwaje intwaro, hamwe n’abo mu miryango yabo baturutse muri Repubulika Iharanira Demokarasi ya Congo.
Izi ntumwa ziturutse mu Ngabo za Uganda (UPDF) zimaze iminsi mu Rwanda, aho zitabiriye inama ya karindwi y’Abayobozi bakorera ku mipaka ihuza Ibihugu byombi.
Iyi nama y’iminsi itatu yatangiye ku wa Gatatu tariki 18 isoza none ku wa Gatanu tariki 20 Gashyantare 2026, iri kubera i Musanze ahasanzwe habarizwa iki Kigo cya Mutobo basuye.
Iyi nama igamije gusuzuma no gukemura ibibazo by’umutekano n’ubufatanye ku mipaka y’ibihugu byombi, gukomeza ibikorwa byubaka amahoro, guteza imbere ubucuruzi n’ibikorwa byambukiranya imipaka, ndetse no kugaragaza amahirwe y’inganda n’ubukerarugendo mu Ntara y’Amajyaruguru.
Ku munsi wa mbere, iyi nama yitabiriwe n’abayobozi b’Amadiviziyo y’Ingabo z’u Rwanda akorera ku mupaka w’u Rwanda na Uganda, bayobowe na Major General Ruki Karusisi uyobora Diviziyo ya 5 na Brigadier General Deo Rusanganwa uyobora Diviziyo ya 2.
Naho ku ruhande rwa UPDF haje abayobozi ba Diviziyo ya 2 y’Ingabo zirwanira ku butaka bayobowe na Major General Paul Muhanguzi.
RADIOTV10
