Abakinnyi 23 bahawe amakarita atukura nyuma y’imirwano ikomeye yadutse hagati y’amakipe ya Cruzeiro na Atlético Mineiro yo muri Brazil mu mukino wa nyuma w’irushanwa rya Campeonato Mineiro.
Uyu mukino wabereye mu mujyi wa Belo Horizonte warangiye Cruzeiro itsinze igitego 1-0, cyatsinzwe na Kaio Jorge, bituma iyi kipe yegukana igikombe cya shampiyona yo muri leta ya Minas Gerais ku nshuro ya mbere kuva mu mwaka wa 2019.
Nubwo Cruzeiro yishimiye igikombe, umukino wasojwe n’imvururu zikomeye zabaye mu masegonda ya nyuma, bituma abashinzwe umutekano ndetse na polisi ya gisirikare batabara kugira ngo bahoshe imirwano yadutse hagati y’abakinnyi b’impande zombi.
Imirwano yatangiye ubwo umunyezamu wa Atlético Mineiro, Everson, yasunikaga umukinnyi wa Cruzeiro Christian akamugusha hasi, ndetse agashyira ivi ku gatuza ke nyuma y’uko bari bahanganiye umupira wari urekuye.
Ibi byatumye bagenzi ba Christian bahita bagarukira Everson, bamukubita ku giti cy’izamu, maze n’abandi bakinnyi b’amakipe yombi barahurura, imirwano irakomera.
Nubwo umusifuzi Matheus Delgado Candançan atigeze atanga amakarita atukura mu gihe umukino wari ugikomeje, nyuma y’umukino hafashwe icyemezo cyo guha abakinnyi 23 amakarita atukura kubera iyo mirwano.
Cruzeiro yahawemo abakinnyi 12, barimo na Kaio Jorge watsinze igitego cy’intsinzi, mu gihe Atlético Mineiro yahawemo abakinnyi 11, barimo n’umukinnyi wamamaye mu ikipe y’igihugu ya Brazil, Hulk.
Nyuma y’umukino, Hulk yavuze ko ibyabaye biteye agahinda, agira ati:
“Birababaje cyane. Ntitwakagombye gutanga urugero nk’urwo kuko bigira ingaruka ku izina ryacu no ku izina ry’ikipe.”
Nubwo amakipe yombi ari mu makipe akomeye muri Brazil, Cruzeiro na Atlético Mineiro kuri ubu ntibiratangira neza shampiyona ya Campeonato Brasileiro Série A, aho Cruzeiro iri ku mwanya wa 17 naho Atlético Mineiro iri ku wa 19 nyuma y’imikino ine ya mbere.
Esther Fifi UWIZERA
RADIOTV10
