Umunyamakuru Uzabakiriho Cyprien uzwi nka Djihad na bagenzi be baregwa hamwe mu rubanza rw’abashinjwa ibifitanye isano no guzakaza amashusho y’urukozasoni y’umuhanzi Yampano, bagiye gusubira imbere y’Umucamanza baburana ubujurire bwabo ku bihano bakatiwe.
Uretse ‘Djihad’ abandi baregwa muri uru rubanza, ni Kalisa John (K John), Kwizera Nestor uzwi nka Pappy Nesta na Ishimwe François Xavier, Kwizera Nestor uzwi nka Pappy Nesta.
Aba bose bahamijwe icyaha cyo gusakaza amashusho yerekeranye n’imikoreshereze y’ibitsina, hakoreshejwe mudasobwa cyangwa urusobe rwa mudasobwa.
Ni icyaha gishingiye ku mashusho y’umuhanzi Uworizagwira Florien uzwi nka Yampano, n’umukunzi we bari gukora igikorwa cy’imibonano mpuzabitsina.
Urukiko rw’Ibanze rwa Kicukiro rwaburanishije urubanza rwa mbere, rwakatiye aba bose igifungo cy’imyaka itatu n’ihazabu ya miliyoni 3 Frw, ndetse bamwe muri aba bakaba bafungiye mu Igororero rya Nyarugenge, mu gihe Kalisa John waburanye adafunze, we akiri hanze.
Nyuma y’icyemezo cy’uru Rukiko cyasomwe tariki 27 Gashyantare 2026, abaregwa bajuririye Urukiko Rwisumbuye rwa Nyarugenge, ndetse rukaba rwaramaze gushyiraho itariki yo kuzaburanisha ubujurire, mu rubanza ruzaba ku wa Mbere w’icyumweru gitaha tariki 04 Gicurasi 2026.
Umunyamakuru Uzabakiriho Cyprien uzwi nka Djihad, yahamijwe icyaha hashingiwe ku kuba yarasangije abantu ariya mashusho muri group ya WhatsApp yashinzwe na we ubwe.
Ni mu gihe Ishimwe Patrick uzwi nka Pazzo Man, wanatawe muri yombi ku nshuro ya mbere mu kirego cyaregwamo aba bantu bose, we yagizwe umwere kuko Ubushinjacyaha butagaragaje uko amashusho ya Yampano yageze muri Telefone ye.
RADIOTV10
