Abofisiye 74 mu Ngabo na Polisi by’u Rwanda ndetse n’Urwego rw’Igihugu rushinzwe Igorora, barangije amasomo ajyanye no kuyobora abandi n’indi mirimo bijyana.
Umuhango wo gusoza aya masomo amaze ibyumweru 22 wayobowe n’Umugaba Mukuru w’Ingabo z’u Rwanda (RDF), Gen Mubarakh Muganga.
Ni amasomo y’Icyiciro cya 26 ajyanye no kuyobora abasirikare n’imirimo bijyana akorwa na Ofisiye bakuru yabereye mu Ishuri Rikuru rya Gisirikare i Nyakinama mu Karere ka Musanze. Muri abo bayarangije harimo abasirikare b’abagore batanu.
Aya masomo yafashije abasirikare bayakurikiye kunguka ubumenyi bwo kuyobora ibikorwa bya gisirikare kugeza ku rwego rwa Brigade, ndetse no gukora neza imirimo y’ubuyobozi n’igenamigambi rya gisirikare.
Mu ijambo rye, Umugaba Mukuru w’Ingabo yashimiye abarangije amasomo, abibutsa ko amahugurwa bahawe yabagize abayobozi bashoboye guteza imbere impinduka nziza no kwimakaza indangagaciro z’ubutwari, ubunyangamugayo n’ubwitange.
Yanashimiye imiryango yabo ku kwihangana bagaragaje mu gihe abo ba ofisiye bari kure yabo.
Yagize ati “Nizeye ko aya masomo yabateguye kuba abayobozi bafite ubushobozi bwo gutekereza ku bisubizo no gufata ingamba ziboneye.
Ndabashishikariza kwitwararika ku nshingano zikomeye zibategereje no gutanga umusanzu mu kubaka igisirikare n’igihugu twifuza kandi dukwiye.
Ndashimira kandi imiryango yanyu yakomeje kubashyigikira mu gihe mwari mu masomo.”
Umuyobozi w’Ishuri Rikuru rya Gisirikare ry’Ingabo z’u Rwanda, Brig Gen Andrew Nyamvumba, yavuze ko abitabiriye bose bujuje ibisabwa, bagasoza amasomo nk’abayobozi kugeza ku rwego rwa Brigade mu ngabo.
Yongeyeho ko bahawe ubumenyi n’imyitwarire bibafasha guhangana n’ibibazo by’umutekano ku rwego rw’igihugu no ku rwego mpuzamahanga.
Maj Alain Kirenga wabaye uwa mbere muri rusange yashimiye ishuri, avuga ko ubumenyi bungutse buzabafasha gukora neza inshingano zabo ku rwego rwa Brigade, haba mu buyobozi no mu igenamigambi.
Capt Orice Kayiranga yabaye uwa kabiri muri rusange, naho Maj Angelo Birasa aba uwa gatatu. Maj James Tindifa Hodali yahawe igihembo cy’inyandiko nziza y’ubushakashatsi.
Uyu muhango witabiriwe n’abayobozi batandukanye, barimo Umuyobozi w’Akarere ka Musanze wari uhagarariye Guverineri, hamwe n’abajenerali n’abandi basirikare bakuru.
RADIOTV10
