Ishyirahamwe ry’Umupira w’Amaguru mu Rwanda (FERWAFA) ryatangaje ko imikino ya gicuti Ikipe y’Igihugu Amavubi yari kuzakinira muri Maroc, yasubitswe nyuma yuko inageze muri iki Gihugu, ubuyobozi bw’umupira bwaho bukamenyesha ubw’u Rwanda ko iyi mikino itazaba ku mpamvu z’umutekano.
Ibi bikubiye mu itangazo ryashyizwe hanze na FERWAFA, “rimenyesha abakunzi b’umupira w’amaguru n’Abaturarwanda muri rusange ko imikino ya gicuti mpuzamahanga Ikipe y’Igihugu Amavubi yari kuzakinira i Marrakech muri Maroc mu gihe cy’ikiruhuko mpuzamahanga cya FIFA cyo muri Kamena 2026, itakibaye.”
Iri tangazo rikomeza rigira riti “Ibi bije bikurikira ubutumwa FERWAFA yahawe n’ubuyobozi bw’umupira w’amaguru muri Maroc bumenyesha ko iyo mikino itemewe kubera impamvu z’umutekano.”
FERWAFA ivuga ko aya makuru yamenyekanye nyuma yuko bamwe mu bagize intumwa z’Amavubi bari bamaze kugera muri kiriya Gihugu.
Muri iri tangazo bakagira bati “FERWAFA yubashye icyemezo cyafashwe n’inzego zibishinzwe muri Maroc, bityo tukaba tumenyesha ko gahunda yo kwitegura imikino yo gushaka itike ya AFCON 2027 ikomeje nk’uko byari biteganyijwe.”
Iri shyirahamwe ry’Umupira w’Amaguru mu Rwanda, rivuga ko nyuma yo kumenyeshwa aya makuru, hafashwe icyemezo ko umwiherero w’Ikipe y’Igihugu y’u Rwanda ukomereza i Cairo mu Misiri, ukazaba hagati ya tariki 04 kugeza ku wa 11 Kamena 2026.
RADIOTV10
