Umutwe wa politiki wa Front pour la Refondation de la Nation (FRN), uyobowe na Joseph Kabila wahoze ari Perezida wa Repubulika Iharanira Demokarasi ya Congo (RDC), washyize hanze ibisobanuro by’ikirango cyawo gishya, ugaragaza icyo amabara n’ibimenyetso bikigize bisobanura.
Mu itangazo ryashyizweho umukono n’Umunyamabanga Mukuru akaba n’Umuhuzabikorwa w’Inzego Nyobozi za FRN, Prof. Freddy R. Kaniki, i Goma ku wa 28 Ukwakira 2026, uyu mutwe wavuze ko ubuyobozi bwawo bwemeje ku mugaragaro icyo kirango.
FRN yasobanuye ko ikirango cyayo kigizwe ahanini n’amabara y’ubururu bwerurutse, umutuku n’umuhondo wa zahabu, buri rimwe rikaba rifite igisobanuro kijyanye n’icyerekezo n’indangagaciro by’uyu mutwe.
Ibara ry’ubururu rigereranya icyifuzo cy’amahoro arambye n’ituze. Ishusho y’ikarita ya RDC iri mu bururu igaragaza ubumwe bw’igihugu, mu gihe intare iriho ishushanya imbaraga, ubutwari n’ubushake bw’Abanye-Congo bwo kubohora no kurinda igihugu cyabo.
Amabara y’umutuku n’umuhondo azengurutse ikarita ya RDC na yo afite ibisobanuro byihariye. Umutuku ugereranya amaraso y’abakunda igihugu n’abaguye mu rugamba rwo kurwanya igitugu no guharanira icyubahiro cy’Abanye-Congo. Umuhondo wo ugaragaza umutungo kamere mwinshi igihugu gifite, hamwe n’ubukungu bw’umuco, amoko n’amadini.
Ikindi kimenyetso kiri kuri icyo kirango ni uruzi rwa Congo rushushanyijwe mu muhondo. FRN ivuga ko rugaragaza isoko y’ubuzima n’iterambere, rukaba n’umuyoboro uhuza ibice bitandukanye by’igihugu.
Inyenyeri y’umuhondo iri ku kirango na yo igereranya urumuri rumurikira Abanye-Congo, icyizere cy’ejo hazaza n’ibyiringiro by’impinduka uyu mutwe uvuga ko uzazana.
FRN yasobanuye ko ikimenyetso cy’amaboko y’abantu bafatanye munsi y’ikarita ya RDC kigaragaza kubana mu mahoro, ubwumvikane n’uburinganire bw’abaturage bose.
RADIOTV10