Ikigo cy’Igihugu gishinzwe Ibarurishamibare mu Rwanda (NISR) cyatangaje ko umubare w’urubyiruko rutari mu kazi, mu mashuri cyangwa mu mahugurwa wazamutseho 1,3 % uva kuri 23,4% wari uriho muri Kanama umwaka ushize wa 2025 ugera kuri 24,7% muri Kanama uyu mwaka wa 2026.
Ibi bikubiye mu bushakashatsi buheruka ku isoko ry’umurimo, bwakorewe mu kwezi kwa Kanama 2026. Amakuru yerekeye urubyiruko areba abantu bafite imyaka iri hagati ya 16 na 30.
Ubwiyongere bwagaragaye cyane ku rubyiruko rw’abahungu, aho umubare w’abatari mu kazi, mu mashuri cyangwa mu mahugurwa wazamutseho amanota 5,4%, uva kuri 17,6% muri Kanama 2025 ugera kuri 23% muri Kanama 2026.
Ku bakobwa, uwo mubare wagabanutseho gato, uva kuri 29,4% ugera kuri 29%. Nubwo wagabanutse, abakobwa bakomeje kuba benshi kurusha abasore mu rubyiruko rutari mu kazi, mu mashuri cyangwa mu mahugurwa.
Iki gipimo kireba urubyiruko rudafite akazi kandi rutiga cyangwa rutari mu mahugurwa. Harimo abashomeri bashaka akazi n’abandi batari mu rwego rw’abakora cyangwa bashaka akazi.
Ubushakashatsi bwerekanye ko 52,8% by’urubyiruko bari bafite akazi, ugereranyije na 54,8% by’abantu bafite imyaka 31 kuzamura. Ubushomeri mu rubyiruko bwari kuri 18,8%, buruta 13,1% bwagaragaye mu bantu bakuru.
Ku isoko ry’umurimo muri rusange, ubushomeri bwazamutse buva kuri 13,4% muri Kanama 2025 bugera kuri 15,6% muri Kanama 2026. Abantu bagera kuri miliyoni 4,8 bari bafite akazi, miliyoni 878.000 bari abashomeri, mu gihe abandi miliyoni 3,2 batari mu rwego rw’abakora cyangwa bashaka akazi.
Ubushakashatsi ku mirimo y’urubyiruko bwashyizwe ahagaragara na Porogaramu y’Umuryango w’Abibumbye ishinzwe Iterambere (UNDP) muri Mata 2026, bwagaragaje ko urubyiruko rwinshi mu Rwanda rukiri mu mirimo idatanga umusaruro uhagije cyangwa rukagira ingorane zo kubona akazi kajyanye n’amashuri n’ubumenyi rufite.
Ubwo bushakashatsi bwagaragaje icyuho mu bumenyi ngiro, ubw’ikoranabuhanga n’ubwo gukorana n’abandi, ndetse n’imikoranire idahagije hagati y’abatanga akazi n’ibigo by’amahugurwa. Bwanagaragaje ko abakobwa n’urubyiruko rwo mu cyaro bahura n’imbogamizi zikomeye kurushaho mu kubona amahirwe.
U Rwanda rufite Ingamba z’Igihugu zo Guteza Imbere Akazi n’Ubumenyi, zigamije guhanga imirimo ifite umusaruro kandi ikwiye miliyoni 1,25 bitarenze mu 2029. Muri izo ngamba harimo amahugurwa ahuzwa n’akazi, kwimenyereza umwuga, gushyira urubyiruko mu kazi gakorera abaturage n’amasomo magufi agenewe abatarari mu kazi, mu mashuri cyangwa mu mahugurwa.
Guverinoma kandi iri gushyira mu bikorwa gahunda yiswe Priority Skills for Growth and Youth Empowerment, ifite agaciro ka miliyoni 200 z’amadolari ya Amerika. Igamije gufasha abantu barenga 200.000, barimo urubyiruko n’abakozi, kubona ubumenyi bujyanye n’ibikenewe ku isoko ry’umurimo bitarenze mu 2029.
Indi gahunda y’amahugurwa yabanje gufasha urubyiruko rugera ku 24.000 rutari mu kazi, mu mashuri cyangwa mu mahugurwa, ndetse n’abakozi bashakaga kongera ubumenyi bafite. Banki y’Isi yatangaje ko 82% by’abasoje ayo mahugurwa babonye akazi cyangwa bihangira imirimo mu gihe cy’amezi icyenda nyuma yo kuyasoza.
RADIOTV10