Mu gikombe cy’Isi cya 2026 kizabera muri Amerika ya Ruguru, amakipe yo ku isi akomeje kugaragara mu mateka y’umupira w’amaguru kubera umubare w’abakinnyi azatanga mu marushanwa, ku isonga haza Manchester City yo mu Bwongereza.
Ku isonga, ikipe ya Manchester City ni yo izaba ifite abakinnyi benshi kurusha andi makipe yose, aho izatanga abakinnyi 19 muri aya marushanwa. Ibi byayihesheje umwanya wa mbere ku rwego rw’isi yose.
Muri abo bakinnyi, bane bari mu ikipe y’igihugu y’u Bwongereza, barimo James Trafford, Marc Guehi, Nico O’Reilly na John Stones. Hari kandi abandi bakinnyi bakomeye bakina mu makipe y’ibihugu bitandukanye, barimo Bernardo Silva, Ruben Dias na Matheus Nunes mu ikipe ya Portugal.
Ibindi bihugu bikomeye na byo bifite abakinnyi benshi bakomoka muri Manchester City. U Buholandi bufite Tijjani Reijnders na Nathan Aké, mu gihe Croatia ifite Mateo Kovačić na Joško Gvardiol. Abandi bakinnyi bazagaragara barimo Erling Haaland (Norway), Rodri (Spain), Jeremy Doku (Belgium), Rayan Cherki (France) n’abandi batandukanye.
Ku mwanya wa kabiri, ikipe ya Bayern Munich ihuriweho na Paris Saint-Germain, buri imwe izatanga abakinnyi 16 mu Gikombe cy’Isi.
Ku mwanya wa kane, ikipe ya Barcelona izatanga abakinnyi 15, mu gihe Arsenal izaba ifite 14.
Iyi raporo igaragaza kandi ko amakipe 18 azaba afite nibura abakinnyi 10 cyangwa barenzeho mu Gikombe cy’Isi, aho amakipe atandatu yo mu Bwongereza ari mu yose afite umubare munini.
Ibi byerekana imbaraga z’amakipe akomeye yo ku mugabane w’u Burayi mu gutegura abakinnyi beza bakina ku rwego mpuzamahanga, ndetse n’uruhare rukomeye rwa shampiyona zikomeye mu gutanga abakinnyi benshi mu marushanwa akomeye ku isi.
Mu mateka, ibi ntibibaye ubwa mbere, kuko mu Gikombe cy’Isi giheruka, Barcelona ari yo yari iyoboye urutonde, naho mu 2018 Manchester City yari ku isonga hamwe na Real Madrid na Barcelona.
Ibi byose bikomeza kugaragaza uko umupira w’amaguru wateye imbere mu guhuza abakinnyi baturuka mu makipe amwe bakajya gukinira ibihugu bitandukanye ku rwego rw’isi.
RADIOTV10
