Abakozi b’Ibitaro Bikuru bya Kaminuza bya Butare (CHUB) basuye Ingoro y’Amateka y’Urugamba rwo Kubohora Igihugu iri mu Karere ka Gicumbi, mu rwego rwo kurushaho gusobanukirwa amateka yaranze urugamba rwo kubohora igihugu no gukomeza kwimakaza indangagaciro zubaka u Rwanda.
Hari mu rugendo abakozi ba CHUB bakoze ku Mulindi w’Intwari kuri uyu wa Gatatu, tariki ya 01 Nyakanga 2026, rugamije gusobanukirwa amateka yaranze urugamba rwo kubohora igihugu n’ubutwari bwaranze ingabo za RPA (Rwanda Patriotic Army).
Hasuwe indake yabagamo Nyakubahwa Perezida wa Repubulika, Paul Kagame, wari uyoboye urugamba rwo kubohora igihugu, inyubako yabagamo ndetse n’iyo yakiriragamo abashyitsi, indake yabikwagamo ibikoresho by’itumanaho rya gisirikare ndetse n’intwaro, inyubako zabagamo abanyapolitiki ba FPR Inkotanyi, ibibuga by’imyidagaduro ndetse n’icyumba cy’inama bifashishaga bakora inama bakanahafatira amafunguro.
Uretse izo ndake ebyiri, izindi nyubako zose zubatswe mu myaka ya 1960, zikaba zari iz’uruganda rw’icyayi rwubatse aha ku Mulindi.
Bamwe mu bakozi ba CHUB bagaragaje ko uru ruzinduko rwabafashije gusobanukirwa neza amateka igihugu cyanyuzemo, banashimangira ko bagomba kugira uruhare mu kubungabunga ayo mateka.
Mutuyimana Jeanette ati: “Bidufitiye akamaro gusura ingoro y’amateka nk’iyi kuko bidufasha gusobanukirwa neza uko urubyiruko bagenzi bacu bitanze rukabohora igihugu, bigatuma natwe tubigiraho mu kubaka ahazaza heza.”
Immaculée Uwumutima ati: “Tuhakura isomo ry’ukuntu abatubanjirije bitanze bubaka igihugu, bikadufasha kwitanga haba mu kazi kacu ka buri munsi no gusigasira ibyagezweho, kugira ngo hatagira ubisenya, ahubwo duharanire kubisigasira.”
Louis Mukotanyi ati: “Twari dusanzwe tuzi amateka yo kubohora igihugu, ariko kutagera aho byakorewe. Kugera ahantu nk’aha h’amateka bidufasha kumenya uko abagize uruhare mu kubohora igihugu babigenje, bikadufasha kubigiraho no kubaka igihugu.”
Umuyobozi Mukuru w’Ibitaro bya CHUB, Ngarambe Christian, avuga ko uru rugendo rugamije kongerera ubumenyi abakozi ku mateka y’igihugu yaranze ubutwari bw’ababohoye igihugu.
Ati: “Tugana mu mpera z’iminsi 100 yo kwibuka Jenoside yakorewe Abatutsi mu 1994, twahisemo kuza gusura Ingoro y’Amateka yo Kubohora u Rwanda kugira ngo tuze ku isoko ry’amateka tuyumve, tubashe kuzirikana amateka y’igihugu, binongere kutwibutsa indangagaciro z’ubumwe no kubakira urubyiruko indangagaciro, kugira ngo rumenye imbaraga z’urubyiruko rwahagaritse Jenoside, bityo na rwo zibafashe kubaka u Rwanda rwibohoye muri iyi myaka 32 ishize no gukomeza kurwubaka babishyira mu bikorwa uyu munsi.”
Prince Theogene NZABIHIMANA
RADIOTV10