Ubuyobozi bwa CECAFA bwatangaje ko bwemereye u Rwanda kwakira irushanwa rya Cecafa Kagame Cup indi myaka 2 iri imbere, bivuze ko iya 2027 na 2028 izabera i Kigali.
Uyu ni umwanzuro wafatiwe mu nama ya Komite Nyobozi ya Cecafa yabereye i Kigali kuri Movenpick Hotel tariki ya 6 Kanama 2026, ikaba yari iyobowe n’Umuyobozi wa Cecafa Paulos Weldehaimanot.
Nyuma y’imigendekere myiza ya Cecafa Kagame Cup 2026, U Rwanda ni rwo rwasabye uburenganzira bwo kwakira izindi editions 2, barabuhabwa.
Uretse Cecafa Kagame Cup y’uyu mwaka(2026) u Rwanda rwakiriye ikegukanwa na Rayon Sports, iri rushanwa ryaherukaga kubera muri iki gihugu mu mwaka wa 2019 ubwo ryari ryegukanwe na KCCA yo muri Uganda.
Cecafa Kagame Cup, ni irushanwa riterwa inkunga n’Umukuru w’igihugu cy’u Rwanda Perezida Paul Kagame guhera muri 2002, rikaba riba mu rwego rwo gutuma amakipe yitegura amarushanwa ya CAF.
Amakipe y’u Rwanda 3 amaze kuritwara inshuro 6, Rayon Sports muri 1998 na 2026; APR FC muri 2004,2007na 2010 mu gihe ikipe ya Atraco yaritwariye muri Sudan muri 2009.
Jean Claude HITIMANA
RADIOTV10