Minisitiri w’Ibikorwa Remezo, Eng. Murwanashyaka Damien ari mu ruzinduko rugamije gukurikirana ishyirwa mu bikorwa ry’imishinga y’ibikorwa remezo, yatangiriye ku gusura imirimo yo kwagura no kongerera ubushobozi uruganda rutunganya amazi rwa Nzove rwitezweho kongera metero kibe 25 000 ku zo rutunganya ku munsi.
Ni uruzinduko yatangiye kuri uyu wa Kabiri tariki 11 Kanama 2026 nk’uko byatangajwe na Minisiteri y’Ibikorwa Remezo, yavuze ko azasura ibikorwa binyuranye.
Iyi Minisiteri yatangaje ko Minisitiri Eng. Murwanashyaka Damien “yatangiye uruzinduko rw’akazi rugamije gukurikirana ishyirwa mu bikorwa ry’imishinga y’ibikorwa remezo hirya no hino mu Gihugu.”
MININFRA ikomeza ivuga ko, uru ruzinduko rwa Minisitiri “Yarutangiriye mu Ntara y’Amajyaruguru, aho yasuye imirimo yo kwagura no kongerera ubushobozi uruganda rutunganya amazi rwa Nzove.”
Iyi Minisiteri igira iti “Iyi mirimo nirangira, ubushobozi bw’uruganda buzava kuri metero kibe 40,000 z’amazi rutunganya ku munsi, bugere kuri metero kibe 65,000, hiyongereyeho metero kibe 25,000 ku munsi.”
Muri uru ruzinduko kandi Minisitiri w’Ibikorwa Remezo, yanasuye imirimo yo kubaka urugomero rw’amashanyarazi rwa Nyabarongo II, ruzaba rufite ubushobozi bwo gutanga megawati 43.5, aho kugeza ubu, imirimo yo kurwubaka igeze ku kigero cya 73%.
Muri Kamena umwaka ushize, Prof. Munyaneza Omar wari Umuyobozi Mukuru w’Ikigo cy’Igihugu gishinzwe Amazi, Isuku n’Isukura (WASAC) yatangaje ko uyu mushinga wo kuvugurura uruganda rw’amazi rwa Nzove, uteganyijwe kurangira bitarenze muri 2028.
Ubwo yahgaragazaga inyungu zitezwe muri uru ruganda, Prof. Munyaneza yagize ati “Uru ruganda nirumara gutunganywa neza ruzongera amazi mu Mujyi wa Kigali, kuko ahari ubu twavuga ko adahagije kuko aturuka mu nganda zitunganya amazi za Nzove zitanga metero kibe ibihumbi 86 ku munsi.”
Muri 2024 Raporo y’Umugenzuzi Mukuru w’Imari ya Leta, yerekanaga ko inganda 11 zitunganya amazi mu Rwanda, zikora ku gipimo cya 86%, naho izindi 12 zikora kigero kiri hagati ya 27% na 77% by’ubushobozi bwazo.
RADIOTV10