Nubwo habura amasaha make ngo shampiyona ikunzwe kurenza izindi ku isi, Premier League, itangire, urubuga Opta rusanzwe rukora ibijyanye na statistics rwatangaje ko Arsenal ari yo kipe ihabwa amahirwe menshi yo kwegukana igikombe cya Premier League muri shampiyona ya 2026/27, nk’uko bigaragazwa n’ibyavuye mu isesengura rya Opta Supercomputer.
Nyuma yo gutwara igikombe cya shampiyona mu 2025/26, Arsenal ihabwa 38% by’amahirwe yo kongera kugitwara, mu gihe Manchester City iri ku mwanya wa kabiri na 20.5%.
Liverpool iri ku mwanya wa gatatu n’9.2%, igakurikirwa na Manchester United ifite 6.2%. Aston Villa yo ihabwa 4.8%, Chelsea 4.1%, naho Tottenham Hotspur ikagira 2.9%.
Opta yakoze simulations 10,000 kugira ngo igerageze kureba uko shampiyona ishobora kurangira.
Arsenal izaba ishaka kuba ikipe ya mbere kuva mu 1934/35 yongera kwegukana Premier League mu bihe bibiri bikurikirana. Mikel Arteta kandi azaba afite igitutu cyo gukomeza intsinzi, cyane ko amakipe menshi ahanganye na yo yahinduye abatoza.
Manchester City yatandukanye na Pep Guardiola, Liverpool ifite Andoni Iraola, Chelsea ifite Xabi Alonso, mu gihe Manchester United izatangira shampiyona iyobowe na Michael Carrick.
Nubwo amakipe menshi yahinduye abatoza, Opta ibona ko gukomeza umutekano n’imikorere Arsenal yari ifite bishobora kuyifasha kurinda igikombe. Icyakora, Manchester City ikomeje kuba mukeba wayo ukomeye.
Shampiyona ya 2026/27 iritezwe cyane, aho amakipe akomeye azaba ahatanira igikombe ndetse n’imyanya yo gukina Champions League.
Aime Augustin
RADIOTV10