Révérien Ndikuriyo, Umunyamabanga Mukuru w’ishyaka CNDD-FDD riri ku butegetsi mu Burundi, yatangaje ko ashobora kuza i Kigali aherekeje ikipe ya Aigle Noir, mu gihe nta zindi gahunda zamubuza kuza mu Rwanda.
Ndikuriyo yabivugiye mu kiganiro yagiranye n’abanyamakuru i Burunga mu mpera z’icyumweru twaraye dusoje, cyibanze ku bibazo bitandukanye biri mu Burundi muri iki gihe.
Uyu muyobozi yavuze ko ikipe ya Aigle Noir ayobora izaza mu Rwanda gukina na Al Hilal mu mukino wo kwishyura wa CAF Champions League, anavuga ko na we ashobora kuyiherekeza.
Ibi abivuze mu gihe umubano hagati y’u Burundi n’u Rwanda utifashe neza, ndetse umupaka uhuza ibihugu byombi ukaba ufunze. Ndikuriyo yavuze ko nubwo inzira yo ku butaka ifunze, ingendo zo mu kirere zigikomeje, bityo abazishoboye bakaba bashobora gukoresha indege.
Ku bijyanye n’umubano w’u Burundi n’u Rwanda, Ndikuriyo yavuze ko nubwo hari ibibazo, guhanahana amakuru hagati y’impande zombi bikomeje.
Mu kiganiro kandi, Ndikuriyo yashimiye abayobozi b’u Burundi babanje kuyobora igihugu, by’umwihariko Pierre Nkurunziza, ndetse na Perezida Évariste Ndayishimiye, agaragaza ko ubuyobozi bukomeje gukorana n’abaturage.
Ku bijyanye n’amatora, yavuze ko imyiteguro irimo kugenda neza, asaba ko hakomeza gushyirwamo imbaraga kugira ngo azakorwe mu buryo bwizewe kandi mu mahoro.
Yavuze kandi ku nkongi z’umuriro zikomeje kwibasira amasoko, asaba abantu kwirinda gutangaza ibyo batahamirijwe, ahubwo bagategereza ibimenyetso n’ibisubizo by’iperereza.
Ndikuriyo yanagarutse ku itumanaho n’ikoranabuhanga, ashimangira ko hakenewe gukomeza kunoza ireme ry’itumanaho ndetse n’ibikorwa remezo by’ikoranabuhanga.
Ku cyemezo cyo gukura ku isoko bimwe mu binyobwa bisembuye, yavuze ko hakenewe guhuza ibijyanye n’ubuzima rusange, kubahiriza amategeko ndetse no gutanga imisoro.
RADIOTV10