Umuhanzikazi wo muri Tanzania, Zuchu, yanditse andi mateka mu muziki wa Afurika y’Iburasirazuba nyuma y’uko indirimbo ye ‘Kwikwi’ igeze ku nshuro miliyoni 100 imaze kurebwa kuri YouTube. Ibi byatumye aba umuhanzi wa mbere wo muri Afurika y’Iburasirazuba ufite indirimbo ebyiri ze bwite zimaze kugera kuri iyi mibare.
‘Kwikwi’ isanze indi ndirimbo ye, ‘Sukari’, imaze kurenga miliyoni 125 z’abayirebye kuri YouTube. Urubuga rwa YouTube rwa Zuchu rugaragaza ko ‘Sukari’ ifite abarenga miliyoni 125 bayirebye, mu gihe ‘Kwikwi’ na yo imaze kugera ku gipimo cya miliyoni 100.
Iyi ntsinzi ya ‘Kwikwi’ irakomeye by’umwihariko kuri Zuchu kuko ari kubigeraho mu ndirimbo ze bwite, nta wundi muhanzi bafatanyije muri izi ndirimbo zombi. Amakuru yatangajwe nyuma y’uyu muhigo avuga ko Zuchu yabaye uwa mbere muri Afurika y’Iburasirazuba ufite amashusho abiri y’indirimbo ze bwite yarenze miliyoni 100 kuri YouTube.
‘Sukari’ imaze imyaka itanu ishyizeho uyu muhigo
‘Sukari’ ni imwe mu ndirimbo zakomeje kugira uruhare runini mu izamuka rya Zuchu kuva yatangira umuziki ku rwego mpuzamahanga. Amashusho yayo yashyizwe kuri YouTube ku wa 30 Mutarama 2021, maze muri Werurwe 2024 iba indirimbo ya mbere ya Zuchu yageze kuri miliyoni 100 z’abayirebye. Icyo gihe, The Citizen yatangaje ko yari abaye umuhanzi w’umugore wa mbere muri Tanzania ugeze kuri uwo mubare mu ndirimbo ye bwite.
Ubu ‘Sukari’ imaze kurenga miliyoni 125, ikomeje kuba imwe mu ndirimbo za Zuchu zarebwe cyane ku rubuga rwa YouTube.
‘Kwikwi’ yongereye Zuchu umwihariko
Nyuma y’uko ‘Sukari’ ibaye iya mbere, ‘Kwikwi’ na yo yageze kuri miliyoni 100, bituma Zuchu aba umuhanzi ufite indirimbo ebyiri ze bwite zageze kuri uru rwego muri Afurika y’Iburasirazuba.
Ibi kandi bishimangira uburyo Zuchu amaze kugira uruhare rukomeye mu guteza imbere umuziki w’abahanzi b’abagore muri aka karere. Mu 2024, The Citizen yari yaragaragaje ko kugera kuri miliyoni 100 kuri YouTube ari intambwe ikomeye kandi idakunze kugerwaho n’abahanzi benshi bo muri Tanzania.
Intambwe ikomeye mu rugendo rwa Zuchu
Zuchu, amazina ye asanzwe ni Zuhura Othman Soud, ni umuhanzikazi ukomoka muri Zanzibar akaba yaramenyekanye cyane nyuma yo kwinjira muri WCB Wasafi. Yatangiye kwigaragaza ku rwego mpuzamahanga mu myaka ya mbere ya 2020, maze mu gihe gito aba umwe mu bahanzi b’abagore bafite izina rikomeye muri Afurika y’Iburasirazuba.
Uyu muhigo wa YouTube wiyongereye ku rutonde rw’ibikorwa byihariye Zuchu amaze kugeraho mu rugendo rwe. Muri 2020, yabaye umwe mu bahanzi b’abagore bo muri Afurika y’Iburasirazuba bageze vuba ku bamukurikira bihoraho (Subscribers ) barenga 100,000 kuri YouTube, nyuma aza no kuba uwa mbere muri aka karere mu bahanzi b’abagore bageze kuri miliyoni imwe y’abamukurikirana kuri urwo rubuga.
Kugeza ubu, miliyoni 100 za ‘Kwikwi’ zongereye uburemere ku izina rya Zuchu muri muzika yo muri Afurika y’Iburasirazuba. Kuba afite ‘Sukari’ irenga miliyoni 125 na ‘Kwikwi’ igeze kuri miliyoni 100, bituma aba umwe mu bahanzi bafite indirimbo ze bwite zageze kure cyane ku rubuga rwa YouTube muri aka karere.
Uyu muhigo kandi ugaragaza ko umuziki wa Tanzania, cyane cyane Bongo Flava, ukomeje kugira uruhare rukomeye mu kugeza ibihangano by’abahanzi bo muri Afurika y’Iburasirazuba ku bantu benshi ku Isi.
Sosthene NKURUNZIZA
RADIOTV10