Indege itwara imizigo ya sosiyete Amazon, yakoze impanuka ikomeye ku kibuga cy’indege mpuzamahanga cya Miami muri Leta Zunze Ubumwe za America, nyuma yo kurenga ku mpera y’umuhanda w’indege ikagonga imodoka zari ziri mu muhanda, abantu batanu bagapfa abandi batanu bagakomereka.
Amashusho yafashwe nyuma y’iyi mpanuka agaragaza abashinzwe ubutabazi bakoresha urwego kugira ngo binjire mu gice cy’imbere cy’indege yo mu bwoko bwa Boeing 767-300, yari yahiye igice cyayo cyo hasi. Hanagaragaye lisansi isohoka inyuma y’indege.
Iyi ndege yari ivuye i San Juan muri Puerto Rico, igwa ku Kibuga cy’Indege cya Miami ku Cyumweru ahagana saa munani z’amanywa, ariko irenga aho yagombaga guhagarara mu nzira y’indege, igonga imodoka nyinshi zagendaga mu muhanda wa Northwest 42nd Avenue, nk’uko ishami rishinzwe ubutabazi rya Miami-Dade ryabitangaje.
Umuyobozi w’ishami rishinzwe kuzimya umuriro, Raied Jadallah, yavuze ko abashinzwe ubutabazi bageze ahabereye impanuka mu masegonda 30 gusa nyuma yo guhamagarwa, bagasanga abantu baheze mu modoka zabo.
Yavuze kandi ko basanze indege ya Boeing 767-300 iri gushya, hakaba hari umuriro mwinshi n’umwotsi mwinshi.
Abantu batanu ni bo bamaze kwemezwa ko bapfuye, mu gihe abandi batatu bari mu bitaro bakomeje kuvurwa mu buryo bukomeye. Abandi babiri na bo bajyanywe kwa muganga bafite ibikomere bitaramenyekana uburemere.
Kugeza ubu, abayobozi ntibaratangaza amazina y’abahitanywe n’iyi mpanuka ndetse n’ay’abajyanywe mu bitaro.
Abagenzacyaha ba Leta bamaze kugera ahabereye impanuka, aho batangiye iperereza rigamije kumenya icyatumye iyi ndege inaga umuhanda w’indege ikarenga ku mpera yawo.
Iyi mpanuka kandi yatangiye guteza ibibazo ku bijyanye n’umutekano w’ikibuga cy’indege cya Miami. Umuvugizi w’Ikigo cya Leta Zunze Ubumwe za America gishinzwe iby’indege (FAA), Hannah Walden, yemeje ko imihanda y’indege kuri iki kibuga idafite uburyo bwihariye buzwi nka Engineered Materials Arresting System (EMAS).
Ubu buryo bukoresha ibikoresho byabugenewe, birimo sima ishobora kumeneka, kugira ngo bifashe kugabanya umuvuduko w’indege irenze ku mpera y’umuhanda, ikabasha guhagarara mu buryo bwizewe.
RADIOTV10