Umuryango wa Afurika Yunze Ubumwe watangaje iby’ingenzi byaganiriweho mu biganiro byahuje Akanama gashinzwe guhuza impande mu nzira zo gushaka amahoro mu burasirazuba bwa Repubulika Iharanira Demokarasi ya Congo n’abahagarariye AFC/M23 ndetse n’izindi nzego, byabereye i Goma.
Muri uru ruzinduko rwabaye tariki 05 Ukwakira 2026, izi ntumwa zari ziyobowe na Sahle-Work Zewde, wahoze ari Perezida wa Ethiopia akaba n’Umuyobozi Wungirije w’Akanama gashinzwe guhuza impande, aherekejwe na Uhuru Kenyatta, wahoze ari Perezida wa Kenya, na Mokgweetsi Masisi, wahoze ari Perezida wa Botswana.
Muri uru ruzinduko, izi ntumwa zagiranye ibiganiro n’abahagarariye MONUSCO, Ishami ry’Umuryango w’Abibumbye rishinzwe guhuza ibikorwa by’ubutabazi (OCHA), Komite Mpuzamahanga Croix-Rouge (ICRC), Expanded Joint Verification Mechanism Plus (EJVM+) ndetse n’ihuriro AFC/M23.
Umuryango wa Afurika Yunze Ubumwe wavuze ko ibi biganiro byari bigamije gushyigikira ibikorwa by’ubuhuza buyobowe n’Umuryango wa Afurika Yunze Ubumwe mu gushaka umuti w’amahoro ku bibazo biri mu burasirazuba bwa DRC.
Aka kanama k’Umuryango wa Afurika Yunze Ubumwe kavuze ko ibi biganiro byagafashije kumva ibitekerezo by’impande zitandukanye ku nzira y’amahoro, ku mutekano n’ibikorwa by’ubutabazi, ndetse no ku ngamba zikenewe kugira ngo impande zongere kugirana icyizere.
Akanama kongereye gushimangira ko amahoro arambye mu burasirazuba bwa DRC asaba ibiganiro bya politiki.
Aka kanama kasabye impande bireba gukomeza ibiganiro mu buryo bwubaka kandi mu bwizerane, by’umwihariko mu nzira y’ibiganiro bya Doha.
Aka kanama kandi kasabye ko amasezerano y’agahenge ko guhagarika imirwano yubahirizwa mu buryo bwuzuye, impande zigafatanya n’inzego zigenzura iyubahirizwa ry’agahenge, ndetse zikirinda ibikorwa bishobora guhungabanya inzira y’amahoro.
Mu byagarutsweho cyane muri ibi biganiro harimo ikibazo cyo kurinda abasivili, cyane cyane abari n’abategarugori.
Afurika Yunze Ubumwe yasabye ko hakorwa ibishoboka byose mu gukumira ihohoterwa rishingiye ku gitsina n’ubundi buryo bw’ihohoterwa, ndetse ko abakora ibinyuranyije n’amategeko babiryozwe.
Akanama kandi kasabye ko ibikorwa by’ubutabazi bigera ku babukeneye mu buryo bwizewe kandi butabangamiwe, ndetse ko ibikorwa by’ingenzi abaturage bakeneye n’ibigo by’amashuri birindwa.
Aba bahuza kandi bavuze ko ibyavuye muri ibi biganiro bazabishyikiriza Umuhuza w’Umuryango wa Afurika Yunze Ubumwe ndetse na Guverinoma ya Repubulika Iharanira Demokarasi ya Congo.
RADIOTV10