Umuhungu w’uwahoze ari Perezida wa Repubulika ya Centrafrique, François Bozizé, yafunzwe z’ubutasi bw’igisirikare cya Repubulika Iharanira Demokarasi ya Congo, bumuhata ibibazo ku mugambi w’ihirikwa ry’ubutegetsi bw’iwabo, nyuma buza kumurekura.
Kévin Bozizé, usanzwe ari impunzi muri DRC kuva se yahirikwa ku butegetsi i Bangui mu myaka 13 ishize, yafatiwe i Kinshasa, aho bivugwa ko yabajijwe ku bijyanye n’abo bakekwaho gutegura umugambi wo guhirika ubutegetsi iwabo muri Centrafrique.
Ku wa Gatanu w’icyumweru gishize, Kévin Bozizé yari yatangiye umunsi we nk’ibisanzwe, ariko ahagana saa yine za mu gitondo, ubwo yari hafi y’agace ka Plateaux des Batéké, muri Komini ya N’Sele, mu mujyi wa Kinshasa, avuga ko yahagaritswe n’abantu bamubwiye ko bakorera ubutasi bw’igisirikare.
Yahise ajyanwa ahantu atabashije kumenya, aho yabajijwe ibibazo. Kévin yavuze ko yabajijwe ku byerekeye umugambi bivugwa ko wari ugamije guhuza abantu kugira ngo habeho ihirikwa ry’ubutegetsi muri Centrafrique.
Kévin Bozizé yamaganye ibyo birego, avuga ko ari ibirego bidafite ishingiro.
Nyuma y’ibazwa, yimuriwe ku cyicaro gikuru cy’ubutasi rusange bwa Polisi, aho yamaze amajoro atatu afunze.
Kévin yavuze ko Ishami ry’Umuryango w’Abibumbye ryita ku Mpunzi (UNHCR) na Komisiyo y’Igihugu ishinzwe Impunzi muri DRC ari bo bagize uruhare mu irekurwa kwe.
Nyuma yo kurekurwa, Kévin Bozizé yavuze ko afite impungenge ku mutekano we, ndetse ko ari gutekereza gusaba ubuhungiro bwa politiki mu kindi Gihugu cya kure ya Centrafrique.
Kugeza ubu, HCR n’ubuyobozi bwa RDC nta cyo baratangaza kuri iki kibazo.
Inkuru y’ifungwa rye ntiyateje impaka nyinshi muri Centrafrique, aho Kévin Bozizé atazwi cyane ugereranyije na murumuna we Jean-Francis Bozizé.
Uyu Jean-Francis we aracyashakishwa n’inzego z’ubutabera kubera uruhare ashinjwa mu myivumbagatanyo yatangijwe na se, François Bozizé muri 2020.
François Bozizé wahoze ayobora Centrafrique kuva mu 2003 kugeza mu 2013, na we afite impapuro mpuzamahanga zo kumuta muri yombi, aho ashinjwa ibyaha birimo ibyibasiye inyokomuntu.
RADIOTV10