Umukinnyi w’Umunyarwanda unakinira ikipe y’u Rwanda Amavubi, Joy-Lance Mickels na Sabah FK, yo muri Azerbaijan, afashije iyi kipe kwegukana intsinzi muri UEFA Champions League, aho yatsinze igitego kimwe muri bibiri, akaba abaye n’Umunyarwanda wa mbere utsinze igitego muri iri rushanwa rikurikirwa na benshi ku Isi.
Ni igitego kimwe muri bibiri iyi kipe ya Azerbaijan yatsinze Slavia Praha, mu mukino wabaye kuri uyu wa Kabiri tariki 13 Ukwakira 2026 muri iri rushanwa rihuza amakipe meza ku Mugabane w’u Burayi.
Joy-Lance Mickels wanafashije iyi kipe ye kubona itike yo gukina iri rushanwa rya UEFA Champions League, yatsinze iki gitego ku munota wa 87, ubwo umukino wasatiraga umusozo, nyuma yuko umunyezamu wa Slavia Praha asohotse ashaka gukuramo umupira, ariko rutahizamu w’Umunyarwanda aba yashyizemo imibare myinshi, ahita anyeganyeza incundura.
Myugariro w’iyi kipe yashatse gukuramo uyu mupira, ariko kubera imibare myinshi ya Joy-Lance Mickels n’ubuhanga yateranye umupira, agerageza kuwukuramo biranga, birangira uruhukiye mu ncundura.
Ni yo nstinzi ikomeye kuri uru rwego ibonywe n’iyi kipe ya Sabah FK nyuma yo gutsindwa umukino wa mbere muri UEFA Champions League, ubwo yatsindwaga na Manchester United ibitego 3-0.
Iyi ntsinzi kandi, ni na yo ya mbere mu mateka y’iyi kipe ibonye muri UEFA Champions League, ndetse akaba ari na cyo gitego cya mbere gitsinzwemo n’Umunyarwanda wari unabaye uwa mbere ukinnye iri rushanwa.
RADIOTV10