Ibikorwa by’ubuhinzi byahagaze mu duce twa Kabizo na Katovu, muri Teritwari ya Rutshuru, mu Ntara ya Kivu ya Ruguru muri Repubulika Iharanira Demokarasi ya Congo nyuma y’imirwano ikomeye yahuje abarwanyi ba FRN n’aba Wazalendo.
Iyi mirwano yabaye kuva mu ijoro ryo ku Cyumweru rishyira ku wa Mbere, tariki ya 26 Ukwakira 2026, ku muhanda uhuza utu duce twombi, mu gace ka Bwito.
Ikinyamakuru ACTUALITE.CD kivuga ko amakuru aturuka mu baturage bo muri ako gace avuga ko abarwanyi ba Wazalendo bateze igico imodoka zari zitwaye abarwanyi ba FRN bari berekeje i Kabizo gushyirayo umuyobozi mushya wa gisirikare. Amakuru y’agateganyo avuga ko abarwanyi batatu ba FRN bishwe muri icyo gitero.
Nyuma y’iyo mirwano, ubwoba bwatashye mu baturage ba Kabizo na Katovu, benshi muri bo batunzwe n’ubuhinzi. Kubera impungenge z’umutekano wabo, abahinzi bahisemo kutajya mu mirima yabo kuri uyu wa Mbere, bituma ibikorwa by’ubuhinzi bihagarara.
Amakuru aturuka muri ako gace avuga ko umutekano ukomeje kuba mubi kandi ko ibintu bishobora guhinduka igihe icyo ari cyo cyose.
Si mu bice byo mu Ntara ya Kivu ya Ruguru gusa birimo imirwano kuko no muri Kivu y’Epfo, imirwano ikomeje gufata intera, byumwihariko mu nkengero z’Umujyi wa Uvira, ahamaze iminsi hari imirwano ikomeye.
Kuri uyu wa Mbere tariki 26 Ukwakira 2026, abarwanyi b’umutwe wa FRN, bafashe agace ka Kawezi, gaherereye mu Ntara ya Kivu y’Epfo kari mu bilometero umunani gusa uvuye mu Mujyi wa Uvira.
RADIOTV10