Ikipe ya Liverpool yo mu Bwongereza yagaragaje Kigali Convention Centre na hoteli ya Radisson Blu mu ifoto yakoresheje mu kwamamaza umukino w’ishiraniro ifitanye na Arsenal muri Shampiyona y’u Bwongereza, Premier League, uteganyijwe kuri iki Cyumweru.
Iyi foto yashyizwe ku rubuga rwa Instagram rw’iyi kipe kuri iki Cyumweru, tariki ya 1 Ugushyingo 2026, igaragaza kapiteni wa Liverpool, Virgil van Dijk, ari kumwe n’umukinnyi Bradley Barcola, batwaye imodoka itukura ifunguye hejuru mu muhanda usa n’uw’i Kigali.
Inyuma yabo hagaragaraga Kigali Convention Centre n’inyubako ya Radisson Blu, by’umwihariko igice cyayo kirangwa n’igisenge kimeze nk’umuzenguruko kimurika nijoro.
Liverpool yaherekeje iyi foto amagambo agira ati: “Turimo kwihuta tugana ku munsi w’umukino”, yongeraho ikirango cya #LFCAfrica. Muri iyo foto kandi hagaragaragamo icyapa kiri ku muhanda cyerekana amakuru y’umukino, harimo n’isaha uzaberaho, ari yo saa 18:30 ku isaha yo mu Rwanda.
Iyi foto yakiriwe neza n’abakunzi b’umupira w’amaguru mu Rwanda, aho bamwe mu bayitanzeho ibitekerezo bifashishije amabendera y’u Rwanda n’ubutumwa bushimira Liverpool kuba yarahisemo gukoresha ishusho ya Kigali mu kwamamaza umukino wayo.
Umukino wa Liverpool na Arsenal urabera kuri Stade ya Anfield, aho Liverpool ifite amateka meza mu mikino iheruka kwakiramo iyi kipe yo mu Mujyi wa Londres.
Arsenal imaze gusura Anfield inshuro 13 mu mikino ya Premier League idatsinda, kuko muri iyo mikino yanganyijemo itanu itsindwa umunani. Intsinzi iheruka kuhakura yayibonye mu mwaka w’imikino wa 2012-2013, ubwo yatsindaga Liverpool ibitego 2-0.
Mu mwaka w’imikino ushize, Liverpool yatsinze Arsenal igitego 1-0 mu mukino ubanza, cyatsinzwe na Dominik Szoboszlai kuri coup franc. Umukino wo kwishyura wabereye kuri Emirates Stadium urangira amakipe yombi anganyije ubusa ku busa.
Ku rundi ruhande, Alexander Isak yari amaze gutsinda ibitego bitandatu mu mikino itandatu iheruka gukina muri Premier League, mu gihe Arsenal yari imaze gukina imikino itanu ya shampiyona idatsindwa igitego, ikaba yari mu makipe afite imibare myiza muri icyo cyiciro.
Umukino wa Liverpool na Arsenal uteganyijwe gutangira saa 16:30 ku isaha ya GMT, bihwanye na saa 18:30 ku isaha yo mu Rwanda.
RADIOTV10