Perezida wa Repubulika Iharanira Demokarasi ya Congo, Félix Tshisekedi, na mugenzi we w’u Burundi, Evariste Ndayishimiye, bongeye guhura mu nama mpuzamahanga yabereye i Brazzaville muri Repubulika ya Congo, nyuma y’iminsi micye bahuriye mu nama y’u Burusiya na Afurika yabereye i Moscow.
Aba bakuru b’ibihugu bahuriye mu muhango wo gutangiza gahunda y’Imiryango y’Abibumbye yo guteza imbere gutera amashyamba no kongera amashyamba yari yarangiritse, izwi nka ‘Decennie des Nations Unies pour le boisement et le reboisement’.
Uyu muhango wabaye kuri uyu wa Gatanu, tariki 06 Ugushyingo 2026, mu rwego rwo kwizihiza ku nshuro ya 40 Umunsi w’Igihugu w’Igiti muri Repubulika ya Congo.
Perezida Tshisekedi yitabiriye iki gikorwa ari kumwe na Perezida wa Repubulika ya Congo, Denis Sassou Nguesso, Evariste Ndayishimiye w’u Burundi na Faustin-Archange Touadéra wa Repubulika ya Centrafrique.
Ibirori byabereye ahitwa Maloukou, ku birometero 45 uvuye mu Mujyi wa Brazzaville, byaranzwe n’umuhango wo gutera ibiti mu rwego rwo kugaragaza akamaro ko kubungabunga amashyamba no kuyongera.
Mu kiganiro n’itangazamakuru cyabereye i Kintélé, Perezida Tshisekedi yagarutse ku kibazo cy’iyangirika ry’amashyamba muri Repubulika Iharanira Demokarasi ya Congo, agaragaza ko kimwe mu bibitera ari ubuhinzi bukorwa mu buryo bwo gutema ibiti no gutwika ibihuru kugira ngo haboneke ubutaka bwo guhingaho.
Yatanze ibitekerezo birimo kwimakaza ubuhinzi bukorerwa ahantu hamwe aho guhora himurwa imirima, guteza imbere ubuhinzi buvanze n’ibiti, kugeza amashanyarazi ku baturage kugira ngo agabanye ikoreshwa ry’inkwi n’amakara, ndetse no kongera gutera ibiti.
Perezida Denis Sassou Nguesso yavuze ko iki gikorwa gifite akamaro ku rwego mpuzamahanga, agaragaza ko Brazzaville ari ho hatangiriye urugendo rushya rwo guhuza Isi mu kurengera amashyamba.
Yagize ati: “Brazzaville ni ho hatangiriye urugendo rwo guhuza Isi mu kurengera amashyamba, aho abazungura b’ibisekuruza biri imbere ari bo bazungukirwa n’iyi gahunda.”
Tshisekedi na Ndayishimiye baherukaga guhura i Moscow
Iyi nama ibaye nyuma y’iminsi micye Tshisekedi na Ndayishimiye bahuriye mu nama y’u Burusiya na Afurika yabereye i Moscow, mu Burusiya, hagati ya tariki ya 28 n’iya 29 Ukwakira 2026.
Ihuriro ry’aba bakuru b’ibihugu mu bikorwa bibiri mpuzamahanga mu gihe gito rikomeje kugaragaza ko bakomeje kwitabira inama n’ibiganiro bigamije ubufatanye hagati y’ibihugu byabo n’ibindi byo ku Mugabane wa Afurika.
Aba Bakuru b’Ibihugu kandi bamaze igihe bagaragaza imikoranire ikomeye, by’umwihariko no mu bijyanye n’umutekano, dore ko u Burundi bwohereje ingabo nyinshi mu Burasirazuba bwa DRC gufatanya na FARDC guhangana n’umutwe wa FRN wahoze ari AFC/M23.
Aba Baperezida kandi bakunze kugenderana mu Bihugu byabo, byumwihariko Perezida Ndayishimiye ukunze kujya muri Repubulika Iharanira Demokarasi ya Congo dore ko aherukayo mu mezi abiri ashize, muri Kanama.
RADIOTV10