Umutwe wa M23 wahise wisubiza agace ka Masisi-Centre nyuma yuko igisirikare cya Repubulika Iharanira Demokarasi ya Congo (FARDC), na cyo cyari cyari cyakisubije.
Hari hatangajwe amakuru ko FARDC ifatanyije na Wazalendo, bagaruje aka gace ka Masisi-Centre kari gaherutse gufatwa na M23 tariki 04 Mutarama 2025.
FARDC na Wazalendo bari bisubije aka gace nyuma y’imirwano ikomeye yari yirije umunsi hirya y’ejo ku wa Gatatu tariki 08 Mutarama 2025.
Amakuru agezweho, aravuga ko kuri uyu wa Kane tariki 09 Mutarama 2025, M23 yaraye yisubije aka gace ka Masisi-Centre, nk’uko byemejwe n’uyu mutwe.
Ni nyuma yuko mu gitondo cyo kuri uyu wa Kane, hiriwe hari imirwano ikomeye mu misozi ikikije agace ka Bweremana, muri Gurupoma ya Mupfunyi Shanga no muri Lokarite ya Mweso, muri Gurupoma ya Bashali Mokoto.
Amashusho yashyizwe hanze na M23 mu ijoro ryo kuri uyu wa Kane, agaragaza abarwanyi b’uyu mutwe bamaze kwisubiza aka gace, bari ku biro Bikuru bya Teritwari ya Masisi n’izindi nzego zo muri aka gace, nk’Ubushinjacyaha bwa Gisirikare, baririmba indirimbo za morali ya Gisirikare, bavuga ko intego yabo ari ukubohora Igihugu.
Amakuru yo kuba M23 yisubije agace ka Masisi-Centre, yanemejwe n’igisirikare cya Congo (FARDC) cyemeye ko aka gace nubwo bari bakisubije, ariko M23 yongeye kukisubiza na yo.
Maj Gen Sylvain Ekenge uvugira FARDC yagize ati “Ingabo zacu zari zisubije agace ka Masisi-Centre ariko umutwe wa M23 bari bakomeje kuguma mu birindiro bikomeye bya Kaungole, byaboroheye kongera kwigarurira Masisi-Centre.”
Amakuru avuga ko imirwano yakomeje, ndetse abasirikare ba FARDC n’abarwanyi b’umutwe wa Wazalendo uri kubafasha, batagiye kure, ahubwo ko bakomeje kurwana kugira ngo bongere bagaruze aka gace.
Ifatwa rya Masisi ryazamuye impaka mu miryango mpuzamahanga, nk’uw’Ubumwe bw’u Burayi, wasabye M23 kuva muri aka gace, igasubira inyuma byihuse.
Ni mu gihe umutwe wa M23 wasubije uyu muryango, uvuga ko bibabaje kubona wivanga muri ibi bikorwa, ukamagana kuba uyu mutwe wafashe aka gace kandi ari ako mu Gihugu cyabo, ndetse ari n’ubutaka bwa benshi mu miryango y’abagize uyu mutwe.
RADIOTV10
