Ishimwe Dieudonne uzwi nka Prince Kid uherutse kugirwa umwere ku byaha akurikiranyweho birimo kwaka undi ishimishamubiri rishingiye ku gitsina, mu kwezi kumwe n’igice biri imbere azasubira imbere y’urukiko mu bujurire bw’Ubushinjacyaha.
Prince Kid washinze Kompanyi yateguraga irushanwa rya Miss Rwanda, akurikiranyweho ibyaha bifitanye isano na ruswa ishingiye ku gitsina bivugwa ko yatswe bamwe mu bakobwa bitabiriye irushanwa rya Miss Rwanda mu bihe binyuranye.
Uyu musore watawe muri yombi muri Mata 2022, yagizwe umwere nyuma y’amezi umunani afunzwe, kuko yasomewe tariki 02 Ukuboza 2022, ahita arekurwa.
Ubushinjacyaha butanyuzwe n’icyemezo cy’Urukiko Rwisumbuye rwa Nyarugenge rwaburanishije uru rubanza, bwahise bujuririra Urukiko Rukuru.
Uru rukiko Rukuru rwajuririwe iki cyemezo cyagize umwere Prince Kid, rwamaze no gushyiraho itariki ruzaburanishwaho, ya 10 Werurwe 2023.
Prince Kid akurikiranyweho icyaha cyo gusaba undi ishimishamubiri rishingiye ku gitsina ndetse n’icyaha cyo guhoza undi ku nkeke bifitanye isano n’imibonano mpuzabitsina.
Urubanza rw’uyu musore, ruri mu zavuzwe cyane mu Rwanda mu mwaka ushize, rwagiye ruburanishwa mu muhezo, gusa bimwe mu byabaga byavugiwe mu maburanisha byagiye bimenyekana, aho byavuzwe ko hari bamwe mu bakobwa bitabiriye irushanwa rya Miss Rwanda bamushinjije kubaka ishimishamubiri rishingiye ku gitsina abizeza ibitangaza.
RADIOTV10
Comments 1
Mukosore umwaka, aho mwanditse ngo,yatawe muri yombi mukwezi kwa 4,mu mwaka wa 2023, sibyo.