Claude Niyomugabo, myugariro w’ikipe y’Igihugu Amavubi na APR FC anabereye kapiteni, ari mu biganiro na Simba Sports Club yo muri Tanzania, aho bivugwa ko ashobora gutangwaho ibihumbi 60 USD [arenga miliyoni 85 Frw].
Ku gicamunsi cyo kuri uyu wa Gatatu tariki 23 Nyakanga 2025, umunyamakuru Ansibert Raphael Mwombeki uzwi nka Hans wa radio ‘Crown FM’ y’i Dar es Salaam muri Tanzania, yatangarije mu kiganiro ‘Toto la Crown FM’ ko Simba Sports Club yamaze kumvikana na APR FC ku kugura kapiteni wayo Claude Niyomugabo.
Uyu munyamakuru Ansibert Raphael Mwombeki ukurikiranira hafi ibijyanye n’igura n’igurishwa ry’abakinnyi, yahamirije RADIOTV10 ko hari amakuru ko Niyomugabo Claude agurwa na Simba ibihumbi 60 USD [arenga miliyoni 85 Frw].
Uyu mukinnyi w’imyaka 26 wakinnye mu makipe arimo Heroes FC, AS Kigali na APR FC, arifuzwa kuko Simba Sports Club iherutse gutangaza ko itazongerera amasezerano myugariro w’ibumoso wayo Mohamed Hussein bita ‘Zimbwe Junior’ wari uyimazemo imyaka 10.
Zimbwe Jr wari kapiteni wa Simba Sports Club biravugwa ko azajya muri mucyeba wayo basangiye umujyi, Yanga Africans itegerejwe i Kigali mu birori bya ‘Rayon Sports Day 2025’ biteganyijwe tariki 15 Kanama 2025 kuri Sitade Amahoro.
Simba Sports Club ni ikipe y’ubukombe muri Afurika y’Iburasirazuba, mu mwaka ushize w’imikino 2024-25 yageze ku mukino wa nyuma wa CAF Confederation Cup 2025, iwutsindirwaho na RS Berkane yo muri Maroc.
Roben NGABO
RADIOTV10