Ikipe ya FC Barcelona yatsinze Sevilla FC ibitego bitatu kuri kimwe ikomeza kwandika amateka mashya ndetse na rutahizamu wayo Raphinha akuraho tumwe mu duhigo twakozwe n’ibihangange byo ha mbere muri ruhago ya Espagne.
Muri uyu mukino wakinwe kuri uyu wa gatandatu taliki ya 19 Nzeli 2026, Sevilla FC yari yasuwe ni yo yafunguye amazamu ku munota wa 19 ku gitego cya Fofana, ariko Barcelona yahise icyishyura ku munota wa 22, gitsinzwe na Raphinha, wanatsinze icya kabiri ku munota wa 52 n’icya gatatu ku wa 69
Muri ibi bitego bitatu yatsinze (hat-trick ), bibiri bya nyuma yabitsinze ku mipira (assists) yahawe na Lamine Yamal.
Barcelona yujuje amanota 21 kuri 21 nyuma yo gutsinda imikino irindwi yose, ikaba imaze no gutsinda ibitego 31, ari nayo ikomeje kuyobora urutonde rwa shampiyona.
Amateka akomeye mu busatirizi bwa Barcelona no kuri Raphinha
Nyuma yo gutsinda Sevilla ibitego 3-1, Barcelona yujuje ibitego 36 mu mikino 8 yose yemewe yakinnye muri uyu mwaka w’imikino (2026-2027) ukiri mu ntangiriro
Ku bijyanye na La Liga gusa, Barcelona imaze gutsinda ibitego 31 mu mikino 7, imibare itari isanzwe igaragara muri shampiyona ya Espagne (La Liga).
Ikipe iheruka kurenga ibitego 30 mu mikino 7 ya mbere ya La Liga ni Sevilla yabikoze mbere y’intambara y’isi yose , kuko yigeze gutsinda ibitego 40 nyuma y’imikino 7 mu mwaka w’imikino wa 1940-1941.
Muri uwo mwaka kandi, Sevilla yari yanyagiye Barcelona ibitego 11-1.
Kapiteni wa Barcelona, Umunya-Brazil Raphinha nawe ari kwandika amateka kubera uduhigo ari guca mu gutsinda ibitego, dore ko yujuje ibitego 12 muri iyi mikino 7 ya La Liga.
Ku myaka ye 29, yahise anganya agahigo n’undi mukinnyi wa Barcelona Mariano Martín , kuko aribo bakinnyi bonyine b’iyi kipe bashoboye gutsinda ibitego 12 mu mikino 7 ibanza muri shampiyona.
Mariano Martin yabikoze mbere y’intambara ya kabiri y’isi , mu mwaka w’imikino 1943-1944.
Kugeza ubu abakinnyi babiri nibo bakirusha Raphinha gutsinda ibitego byinshi mu mikino 7 mu mateka ya shampiyona ya Espagne.
Uwa mbere ni Echevarría watsinze ibitego 14 mu 1943-1944 , mu gihe uwa kabiri ari igihangange Cristiano Ronaldo watsinze ibitego 13 mu 2014-2015 ari nawe wenyine wabikoze nyuma y’intambara ya kabiri y’isi.
Raphinha kandi yaciye akandi gahigo ko gutsinda ibitego bitatu mu mukino umwe (hat-trick) akabikora inshuro ebyiri zikurikiranya muri la liga.
Hat-trick yaraye atsinze yiyongereye kuyo yatsinze mu mukino Barcelona yakinnye na Racing Santander, aba umukinnyi wa mbere utsinze hat-trick ebyiri zikurikiranya muri La Liga kuva muri 2017-2018 ubwo byakorwaga na Antoine Griezmann.
Raphinha yanakoze icyo bita “perfect hat-trick”, aho yatsinze igitego kimwe n’umutwe, ikindi akoresheje ukuguru kw’iburyo, n’ikindi akoresheje ukuguru kw’ibumoso.
Nta mukinnyi wa Barcelona wari warigeze abikora kuva muri 2015 ubwo byakorwaga na Luis Suárez.
Kugeza ubu ariko mu mateka ya la Liga , Real Madrid niyo igifite agahigo ko gutsinda imikino myinshi mu ntangiriro za shampiyona, kuko mu 1968-1969 yatsinze imikino 9 yikurikiranya.
RADIOTV10