Kiliziya Gatulika muri Uganda, iratangaza ko imaze amezi atatu, ifite ikibazo cy’ibura rya Divayi, isanzwe yifashishwa mu guhazwa mu gushushanya amaraso ya Yezu Kristu, bitewe n’intambara yo muri Gaza.
Ikinyamakuru Daily Monitor, gitangaza ko, kuva mu kwezi kwa Gashyantare uyu mwaka wa 2024 Abakirisitu bo muri Liliziya Gaturika babuze Divayi yifashishwa mu guhazwa.
Iki kibazo cyatewe n’intambara iri kubera muri Gaza ihanganishije Israel n’umutwe wa Hamas kuko ubusanzwe yajyaga itumizwa muri Asia no mu Burayi ikambuka inyanja ya Mediterranean ndetse n’itukura, none amayira arasa n’ayafunzwe.
Ni ibintu birimo gutuma iyo divayi ikoreshwa kuri Aritali bahazwa irimo kuzengurutswa ikanyura mu nyanja ya Atlantic no mu nyanja y’Abahinde igakomeza no ku cyambu cya Mombasa muri Kenya ikabona kwinjira muri Uganda, bigatuma igera muri iki Gihugu bitinze.
Kubura kwa Divayi muri Kiliziya Gatulika ni ikibazo gikomeye kuko bayifata nk’amaraso ya Yezu yabameneye ubwo yari ari ku musaraba.
Olive YAMBABARIYE
RADIOTV10
