Abanyamuryango b’Umuryango Unity Club Intwararumuri bagiye guhurira mu Ihuriro rya 17 riteganyijwemo ibikorwa binyuranye birimo kugaragarizwa ibikibangamiye ubumwe bw’Abanyarwanda muri iki gihe, ndetse rikazanakirirwamo abanyamuryango bashya 19.
Iri huriro rya 17 rizaba mu mpera z’iki cyumweru tariki 16 Ugushyingo 2024, ryateguwe ku bufatanye bw’Umuryango Unity Club Intwararumuri na Minisiteri y’Ubumwe bw’Abanyarwanda n’Inshingano Mboneragihugu (MINUBUMWE).
Mu itangazo ryashyuzwe hanze na Unity Club Intwaramuri kuri uyu wa Kane tariki 14 Ugushyingishyingo, rivuga ko “Iri huriro rizibanda ku ntego rusange yo gukomeza kwimakaza umuco w’ibiganiro byubaka kandi bishimangira Indangagaciro na Kirazira z’Umuco Nyarwanda.”
N’ubundi iri Huriro rizaba rifite insanganyamatsiko igira iti “Ndi Umunyarwanda Igitekerezo ngenga cy’Ukubaho kwacu.”
Unity Club Intwaramuri, ivuga ko iri Huriro rya 17 rije mu gihe Abanyarwanda bari mu ntangiro za gahunda y’iterambere y’imyaka itanu ya Guverinoma (NST2).
Ubuyobozi bw’uyu Muryango bukagira buti “Nk’Intwararumuri ziri ku ruhembe rwo kwesa imihigo ikubiye muri iyi gahunda, ni umwanya ku bayobozi bazaba bateranye wo gukora ubusesenguzi bugamije kwihutisha no kunoza ibyo bakora, batekerereza kandi bamurikira u Rwanda n’Abanyarwanda.”
Iri tangazo rikomeza rivuga ko “Muri iri Huriro, MINUBUMWE izagaragaza ibikibangamiye Ubumwe bw’Abanyarwanda muri iki gihe turimo.”
Iri huriro rya 17 rizabanzirizwa n’Inteko Rusange y’Abanyamuryango ba Unity Club, aho bazaganira ku buzima bw’umuryango, hakanakirwa abanyamuryango bashya 19 binjiye muri Unity Club muri uyu mwaka.
Kuri uwo munsi kandi hateganyijwe ihuriro ryaguye rizahuza abanyamuryango ba Unity Club n’abandi batumirwa barimo abayobozi bo mu nego nkuru z’ubuyobozi bw’Igihugu kugeza ku bayobozi b’Uturere, Sosiyete sivile, Abikorera, Abahagaririye amadini n’urubyiruko, ndetse n’Abarinzi b’Igihango ku rwego rw’Igihugu.
Iri huriro rizasozwa abanyamuryango ba Unity Club n’Abatumira, bamurikirwa imyanzuro ngiro y’iri huriro, ndetse habeho no gutanga ishimwe (Unity Award 2024) ku Barinzi b’Igihango ku rwego rw’Igihugu.
Umuryango Unity Club Intwaramuri usanzwe ugizwe n’abayobozi bari muri Guverinoma n’abayihozemo ndetse n’abo bashakanye, kugeza ubu ufite abanyamuryango 332.
RADIOTV10
