Rutahizamu w’Umunyarwanda, Byiringiro Lague w’Ikipe y’Igihugu Amavubi, ukinira ikipe ya Sandvikens IF yo muri Sweden, yigaragaje mu mukino iyi kipe yatsinzemo ibitego bitanu, birimo bibiri bye, byatumye aba umukinnyi w’umukino.
Ni umukino wabaye kuri uyu wa Kane, wahuzaga iyi kipe ya Sandvikens IF yo mu cyiciro cya gatatu ndetse na Hammarby Talang FF, warangiye iyi ikinamo Umunyarwanda, itsinze ibitego 5-2.
Muri ibi bitego bitanu, harimo bibiri bya rutahizamu w’Amavubi, Byiringiro Lague, birimo icyo yatsinze ku munota wa 76’ w’umukino ndetse n’icyo yatsinze mu minota y’inyongera (90+2’).
Byiringiro Lague wagaragarijwe urukundo rudasanzwe n’abakunzi b’iyi kipe, yahise anatorwa nk’umukinnyi mwiza w’uyu mukino (Man of the Match).
Mu butumwa bwanyujijwe kuri Twitter y’iyi kipe, ubuyobozi bwayo bashimiye Byiringiro Lague kuri ibi bitego yayitsindiye, biri mu byayihesheje intsinzi.
Ubu butumwa bunaherekejwe n’ifoto yakozwe ya Byiringiro Lague yo kumushimira, bugira buti “Turagushimiye Lague […] Lague yabaye umukinnyi w’umukino, atowe n’abafana.”
Byiringiro Lague wavuye mu Rwanda afashije ikipe y’Ingabo z’u Rwanda APR FC kwegukana ibikombe bya Shampiyona, yageze muri Sweden muri Werurwe uyu mwaka, aho muri iyi kipe yasanzeyo Umunyarwanda mugenzi we Yannick Mukunzi bakinana ubu.
RADIOTV10
