Ikipe ya Manchester United yo mu Bwongereza yatangaje ku mugaragaro ko Mauricio Pochettino ari we mutoza mushya w’ikipe, nyuma y’amasaha yuko itangaje ko yatandukanye na Michael Carrick wari uyitoza.
Mu itangazo iyi kipe yashyize hanze, yavuze ko Pochettino yemeye kuyitoza guhera ku wa 18 Ugushyingo 2026.
Manchester United yatangaje ko yumvikanye n’Ishyirahamwe ry’Umupira w’Amaguru muri Leta Zunze Ubumwe za Amerika (US Soccer Federation) kugira ngo uyu munya-Argentine n’abo bazakorana barekurwe nyuma yo gusoza inshingano zabo mu ikipe y’igihugu y’abagabo ya Amerika.
Pochettino azwiho kubaka amakipe akomeye arangwa n’ubufatanye ndetse no gufasha abakinnyi kuzamura urwego rwabo.
Uyu mutoza w’imyaka 54 y’amavuko afite ubunararibonye mu makipe akomeye yo mu marushanwa atandukanye. Yatangiye umwuga wo gutoza mu 2009 muri Espanyol yo muri Espagne, mbere yo kwerekeza muri Southampton yo mu Bwongereza.
Muri Southampton, yayifashije kugera ku manota menshi kurusha ayo yari yarigeze kubona mu mateka yayo muri Shampiyona y’u Bwongereza, Premier League, mu mwaka wa 2014.
Nyuma yaho yerekeje muri Tottenham Hotspur, ayitoza imyaka itanu y’imikino. Yayigize ikipe ihora ihatanira itike yo gukina UEFA Champions League, ayifasha kuyikina mu myaka ine y’imikino ikurikirana ndetse ayigeza ku mukino wa nyuma w’iri rushanwa ku nshuro ya mbere mu mateka yayo muri 2019.
Muri 2021, Pochettino yerekeje muri Paris Saint-Germain yo mu Bufaransa, ayihesha igikombe cya shampiyona, Ligue 1, Coupe de France ndetse na Trophée des Champions.
Muri 2023, yahawe akazi ko gutoza Chelsea yo mu Bwongereza, mbere yo kwerekeza mu ikipe y’Igihugu ya Leta Zunze Ubumwe za Amerika.
Mu nshingano ze ziheruka, yayoboye iyi kipe y’Igihugu mu Gikombe cy’Isi cya FIFA, ayigeza muri 1/8 cy’irangiza.
Kuva Manchester United yatangaza ko yatandukanye na Michael Carrick kugeza ishyize ahagaragara Pochettino nk’umutoza mushya, byabaye mu gihe gito, mu gihe abafana b’iyi kipe bategereje kureba impinduka azazana mu ikipe imaze igihe ishaka kongera guhatanira ibikombe bikomeye.
RADIOTV10