Rusesabagina Paul ukurikiranyweho ibyaha birimo iby’iterabwoba, ntiyitabye Urukiko rw’Ubujurire rwatangiye kumva ubujurire bw’Ubushinjacyaha n’ubwa bamwe mu baregwa ku cyemezo cyafashwe n’Urugereko rw’Urukiko Rukuru ruburanisha ibyaha Mpuzamahanga n’ibyambukiranya imipaka.
Muri iri buranisha ry’ubujurire, Urukiko rwahaye umwanya bushinjacyaha ng bugire icyo buvuga kuri Paul Rusesabagina utitabye urukiko mu gihe bagenzi be bose baregwa hamwe bitabye.
Ubushinjacyaha buvuga ko hakurikijwe ibimenyetso biri muri System, Rusesabagira Paul yahamagajwe mu buryo bukurikije amategeko.
Buvuga ko tariki 30 Ukuboza 2021 Ubuyobozi bwa Gereza bwanditse ko Rusesabagina yamenyeshejwe ko azaburana ubujurire bwe tariki 17 Mutarama 2022 gusa Rusesabagina yanze gushyiraho umukono ku nyandiko ibatumiza mu gihe abandi 20 bose baregwa hamwe bayishyizeho umukono.
Buvuga kandi ko Ubwanditsi rw’Urukiko Rukuru bwanditse ibaruwa Tariki 17 Ukuboza 2021, bwamenyesheje Rusesabagira itariki yo kuburana ndetse ibaruwa ayibona 27 Ukuboza 2021.
Umushinjacyaha “Kuba rero atitabye urukiko kandi yarahamagajwe mu buryo bukurikije amategeko, bigaragaza ko yanze kwitaba kandi abizi.”
Ubushinjacyaha buvuga ko ingingo ya 128 y’itegeko ryerekeye imiburanishirize y’imanza z’inshinjabyaha, iteganya ibikurikizwa mu gihe uregwa atitabye Urukiko ko urubanza rukomeza adahari mu gihe yamenyeshejwe mu buryo bukurikije amategeko.
Bamwe mu bunganira abaregwa n’abunganira abaregera indishyi basabye Urukiko rw’Ubujurire ko Urubanza rwakomeza mu gihe bigaraga ko umwe mu baregwa yamenyeshejwe igihe cyo kuburana ariko akaba atitabye.
Bavuga ko nk’uko bigaragara muri system, Rusesabagina yakomeje gusurwa no gukorana n’abamwunganira ku buryo ntagushidikanya ko asanzwe azi iby’iburanisha ry’uyu munsi.
Nyuma yo kumva impaka z’impande z’ababuranyi, Umucamanza yategetse ko urubanza rusubikwa kugira ngo hasuzumwe ibyaburanyweho ubundi umwanzuro ukazasomwa kuri uyu wa Kabiri tariki 18 Mutarama 2022.
RADIOTV10
