Umunyamakurukazi Yvonne Kayitesi uzwi nka Tessy, nyuma yo kwambika impeta y’urukundo n’umuhanzi w’umuraperi Shizzo, yamubwiye amagambo y’urukundo yishimira kuba yarinjiye mu buzima bwe.
Ni nyuma yuko mu mpera z’icyumweru twaraye dusoje, umuhanzi Shizzo yambitse impeta y’urukundo uyu munyamakurukazi Tessy, mu birori byabereye i Dubai, aho bombi bari bishimira urukundo rwabo.
Mu butumwa yanyujije kuri Instagram buherekeje amafoto yasangije abantu ubwo yambikwaga iyi mpeta, Tessy yagize ati “Mu maso yawe ni ho nibona iteka ryose. Uru ni urukundo rw’ubuzima bwose ndetse n’ibyishimo. Nishimira kugukunda buri gihe.”
Urukundo rw’aba bombi rwavuze kuva mu mpera z’umwaka ushize wa 2024, ariko bombi bakaba barakunze kubigira ibanga, ariko buri umwe akanyura ku mbuga nkoranyambaga akagaragaza ko afitiye undi amarangamutima y’urukundo.
Uyu munyamakuru Tessy uherutse gusezera ku gitangazamakuru Isango yakoreraga, yari aherutse kubazwa kuri uru rukundo, ariko ntiyabyerura, gusa yemeza ko Shizzo ari inshuti ye idasanzwe, gusa ateguza abantu ko niba urukundo rwabo ruhari bizigaragaza.
Umuraperi Shizzo wambitse impeta y’urukundo uyu munyamakurukazi, asanzwe atuye muri Leta Zunze Ubumwe za America, akaba kandi yarigeze kuvugwa mu rukundo na Alliah Cool na we usanzwe azwi mu ruganda rw’imyidagaduro byumwihariko muri filimi.
RADIOTV10
