Umujyanama mu bya gisirikare mu biro by’Uhagarariye u Rwanda mu Muryango w’Abibumbye, Col Deo Mutabazi akaba anahagarariye inyungu z’Ingabo (Defence Attaché) z’u Rwanda muri Jamaica; yasuye Umugaba Mukuru w’Ingabo za Jamaica amushyikiriza ubutumwa bwa mugenzi we w’u Rwanda General Mubarakh Muganga.
Col Deo Mutabazi yari kumwe kandi na Col Moses Kayigamba uyoboye itsinda ry’Ingabo z’u Rwanda ziri muri Jamaica zagiye mu bikorwa byo gutanga umusanzu mu gusana ibikorwa byangijwe n’ibiza.
Aba bombi basuye Umugaba Mukuru w’Ingabo za Jamaica-JDF (Jamaica Defence Force), Vice Admiral Antonette Wemyss-Gorman ku Cyicaro Gikuru cy’ubuyobozi bw’Ingabo za kiriya Gihugu, muri Kingston.
Vice Admiral Antonette Wemyss-Gorman yashimiye ubuyobozi bw’Ingabo z’u Rwanda, iki Gihugu cyaroherereje icyabo ingabo zo gufasha abaturage ba Jamaica mu gusana ibyangijwe n’Inkubi y’Umuyaga (Hurricane Melissa).
Ubuyobozi bwa RDF, buvuga ko “Col Déo Mutabazi yaboneyeho gushyikiriza ubutumwa bwatanzwe n’Umugaba Mukuru w’Ingabo z’u Rwanda (RDF), General MK Mubarkh, agaragaza ko ashimira ubufatanye bukomeye hagati y’Ingabo z’u Rwanda n’Ingabo za Jamaica, anavuga ko u Rwanda rukomeje gushimangira umubano hagati y’Ibihugu byombi kandi ko rwiteguye gufatanya na Jamaica mu bindi bikorwa.”
Muri Mutarama uyu mwaka, u Rwanda rwohereje itsinda ry’ingabo z’inzobere mu bwubatsi zagiye gutanga umusada mu gusana ibikorwa remezo byangijwe n’iriya nkubi y’umuyaga.
Mu gihe cy’amezi abiri, iri tsinda ry’inzobere mu bwubatsi muri RDF, rifatanyije n’abo muri JDF, bakoze ibikorwa binyuranye birimo gusana inzu 62, ndetse no kubaka ibyumba by’inyongera by’amashuri no gukora neza inzu y’abana bafite ubumuga.
RADIOTV10
