Umugore n’umugabo we bakomoka muri Tanzania bakekwaho gusinziriza abagenzi muri bisi, bakababiba ibikoresho byabo birimo telefoni, na mudasobwa, bafatiwe mu Mujyi wa Mombasa muri Kenya.
Abashinzwe ubugenzacyaha muri Kenya (DCI) bavuga ko uyu mugore n’umugabo we bafashwe nyuma yuko iperereza kuri dosiye y’umwe mu bagenzi bambuwe n’aba bantu, rigejeje abashinzwe umutekano mu rugo rwabo ruherereye mu gace ka Magongo.
Ubu bujura bwabaye ku wa 18 Nzeri 2026, ubwo umugenzi yari afashe bisi ya Dreamline yavaga i Nairobi yerekeza i Mombasa.
Abashinzwe iperereza bavuga ko uwo mugenzi yari yicaye iruhande rw’umuntu bivugwa ko yamusinzije mu gihe bari mu rugendo, bituma atakaza ubwenge.
Uwo mugenzi yongeye kugira ubwenge ari ku bitaro bya Tudor Sub-County Hospital, ahita asanga umufuka we n’ibindi bintu bye byibwe.
Ibyo byatumye abagenzacyaha bo kuri Sitasiyo ya Polisi ya Makupa batangira iperereza, bakurikirana amakuru kugira ngo bamenye abari inyuma y’ubu bujura.
Iperereza ryaje kubageza mu gace ka Magongo, aho bafatiye aba bashakanye bakomoka muri Tanzania, umugabo w’imyaka 52 n’umugore we w’imyaka 47.
Mu gusaka urugo rwabo, abagenzacyaha babonye ibimenyetso bikomeye bishobora gufasha mu iperereza, birimo mudasobwa yo mu bwoko bwa HP na telefoni ya iPhone 17 Pro Max by’umugenzi wari wasinzijwe.
Uretse ibyo bikoresho, abagenzacyaha banasanze muri urwo rugo izindi telefoni, sharigeri za telefoni 20, amasaha 10, amasakoshi 20 ndetse n’imyambaro itandukanye.
DCI yatangaje ko kuba barabonye ibikoresho by’umugenzi byafashwe bishobora gufasha abagenzacyaha kumenya niba aba bakekwa bafite aho bahuriye n’ibindi bikorwa by’ubujura nk’ibi byakorwe abagenzi bakoresha bisi hagati ya Nairobi na Mombasa.
Aba bashakanye bakomeje gufungirwa kuri sitasiyo ya Polisi mu gihe iperereza rikomeje kugira ngo bazashyikirizwe inzego z’ubutabera. Ibikoresho byafashwe na byo bikomeje kubikwa nk’ibimenyetso.
DCI yibukije ko ingendo ndende akenshi zituma abantu benshi bataziranye bagenda muri bisi imwe, bigatuma kumenya uwo umuntu yakwizera bigorana, cyane cyane iyo umugenzi afite telefoni, mudasobwa n’ibindi bikoresho by’agaciro.
RADIOTV10