Nyuma yuko abasore babiri bakurikiranyweho uruhare mu rupfu rwa Olga Kayirangwa, barekuwe by’agateganyo, umuryango wa nyakwigendera watangaje ko wababajwe n’iki cyemezo cyafashwe mu buryo butari bwitezwe.
Irekurwa rya Nasagambe Fred ukekwaho icyaha cy’ubwicanyi buturutse ku bushake na Gatare Gideon Junior ukekwaho ubufatanyacyaha, ryamenyekanye kuri uyu wa Kabiri tariki 19 Ugushyingo 2024, nyuma yuko ku wa Mbere Urukiko Rwisumbuye rwa Nyarugenge rwari rwemeje ko bakomeza gufungwa by’agateganyo.
Nyuma y’irekurwa ry’aba basore, umuryango ukomokamo Olga, uhagararirwe na nyakwigendera Maj Gasagure Innocent washyize hanze itangazo rivuga uko wakiriye iki cyemezo.
Iri tangazo ryashyizwe hanze kuri uyu wa Kabiri, ritangira rivuga ko “Umuryango wa nyakwigendera Major Gasagure Innocent wababajwe cyane unaterwa agahinda no kwakira amakuru y’ifungurwa rya Fred Nasagambe, ukekwaho kugira uruhare rw’ibanze na Gatare Gideon ukekwaho ubufatanyacyaha mu rupfu rwa Olga Kayirangwa wacu dukunda.”
Uyu muryango ukomeza uvuga ko irekurwa ryabo ryaje nyuma yuko Urukiko rw’Ibanze n’urw’Isumbuye, zifashe icyemezo ko abakekwa bafungwa by’agateganyo hashingiwe ku bimenyetso byatanzwe.
Uti “Nubwo twubaha inzira z’ubucamanza ndetse n’imikorere yabwo, iki cyemezo kitari cyitezwe cyadusize mu rujijo rw’ibibazo ndetse n’aho ikirego gihagaze n’aho kigana.”
Gusa uyu muryango ukomeza uvuga ko ugikomeje kugirira icyizere Ubucamanza bw’u Rwanda ndetse ko wizeye ko uzahabwa ubutabera, kabone nubwo irekurwa ry’abakekwaho uruhare rw’urupu rw’umwana wawo, ryabasigiye agahinda gakomeye.
Uti “Kandi turasaba mu cyubahiro kigombwa ko ubuyobozi bubifite mu nshingano bwatanga umucyo ku mpamvu z’icyemezo cyafashwe, ndetse no kwizera ko ubutabera buzatangwa mu buryo buboneye.”
Uyu muryango ukomeza uvuga ko urupfu rw’umwana wawo rwawusigiye agahinda gakomeye, bityo ko bikwiye ko hazakoreshwa imbaraga zose zishoboka kugira ngo hamenyekane ikihishe inyuma yarwo, ukizeza ko uzakomeza gukorana n’inzego z’ubucamanza kugira ngo ukuri n’ubutabera kuri nyakwigendera, biboneke.
RADIOTV10
