Umufasha wa Edgar Lungu wabaye Perezida wa Zambia, yatawe muri yombi akurikiranyweho ibyaha birimo kugira imitungo yabonye mu buryo bw’uburiganya.
BBC dukesha iyi nkuru, iravuga ko Esther Lungu w’imyaka 66 y’amavuko, yatawe muri yombi ari kumwe n’umukobwa we Chiyeso Katete, n’umwe muri bene wabo wa hafi witwa Charles Phiri, kugeza ubu bakaba bafungiwe mu murwa mukuru i Lusaka.
Bimwe mu birego ashinjwa, harimo kubona inzu ihenze cyane i Lusaka mu buryo bunyuranyije n’amategeko ku buryo yananiwe no kubitangira ibisobanuro, nk’uko bivugwa n’itangazo ry’ikigo cya leta Drug Enforcement Commission (DEC).
Edgar Lungu wahoze ari Perezida wa Zambia, yavuze ko umuryango wabo witeguye kuburana mu rukiko kuri ibi birego uregwa.
Avuga ko we n’abo mu ishyaka rye Patriotic Front (PF) bari kubuzwa epfo na ruguru na Leta, mu rwego rwo kumubuza kugaruka kwiyamamaza mu magora y’Umukuru w’Igihugu yo mu mwaka wa 2026.
Assoumani TWAHIRWA
RADIOTV10
