Ubuyobozi bwa Rwanda Premier League bwashyizeho uburyo bwihariye buzajya bufasha abanyabigwi mu mupira w’amaguru mu Rwanda kwinjira no kureba imikino ya BK Pro League, hatabayeho kugura amatike y’ahantu bazajya bicara.
Iyi gahunda igamije guha agaciro no korohereza abantu bagize uruhare mu iterambere ry’umupira w’amaguru mu Rwanda, barimo abahoze bakinira Ikipe y’Igihugu, Amavubi, abatoza, abayobozi ba tekiniki mu makipe akina BK Pro League, abasifuzi n’abakomiseri b’imikino.
Mu itangazo Rwanda Premier League yashyize hanze kuri uyu wa Mbere tariki 12 Ukwakira 2026, yagaragaje ko buri sitade izajya igenerwa imyanya yihariye yiswe ‘Legends Corner’, izajya ikoreshwa n’abo banyabigwi mu gihe hakinwa imikino ya shampiyona.
Rwanda Premier League yatangaje ko sitade zifite ubushobozi bwo kwakira abantu bari munsi ya 5.000 zizajya zigenerwa imyanya 25, mu gihe izifite ubushobozi bwo kwakira abantu barenga 5.000 zizajya zigenerwa imyanya 50.
Iyi myanya izajya itegurwa ahantu hatwikiriye muri sitade cyangwa mu gice cya VIP, bitewe n’imiterere ya sitade yakiriye umukino.
Mu gutegura urutonde rw’abemerewe gukoresha iyi myanya, Ishyirahamwe ry’Abakinnyi, Footballers Association for Player Advocacy (FAPA), rizajya rikorana n’Ishyirahamwe ry’Abatoza mu Rwanda, Association of Football Coaches in Rwanda (AEFR).
Aya mashyirahamwe azajya ategura urutonde rw’abemerewe kwicara muri iyo myanya, rukagezwa ku ikipe yakiriye umukino ku munsi uzakinirwaho.
Rwanda Premier League yanagaragaje ko iyi myanya itazajya igurishwa cyangwa ngo ishyirwe muri sisitemu ikoreshwa mu kugurisha amatike y’umukino.
Byongeye kandi, ikipe yakiriye umukino izajya igira uburenganzira bwo kwinjiza abakinnyi bahoze bayikinira, mu rwego rwo gukomeza kubaha uruhare bagize mu mateka n’iterambere ryayo.
Iyi gahunda ije mu gihe umupira w’amaguru mu Rwanda ukomeje gushakirwa uburyo bwo kongera agaciro k’abawugizemo uruhare, by’umwihariko abakinnyi n’abandi banyamwuga bawumazeho imyaka bakorera.
RADIOTV10