Ubwo harimo hakorwa umuhango wo gushyingura Colonel Patrick Gisore n’umugore we Yvonne Nyamahoro baherutse kugwa mu mpanuka y’indege ya gisirikare, hadutse akaduruvayo k’abarwanyi b’umutwe wa Wazalendo ukorana n’ubugetsi bwa DRC.
Ibi byabaye kuri uyu wa Mbere muri Uvira ubwo hashyingurwaga aba bitabye Imana bazize impanduka y’indege ya gisirikare yabaye tariki 16 Kanama 2025.
Abarwanyi b’umutwe wa Wazalendo ukorana na Leta ya DRC, basanzwe baba muri kariya gace, barogoye iki gikorwa nyuma yo guteza intugunda.
Aba barwanyi bateje aka kavuyo, bashinja abo mu muryango w’Abanyamulenge gukorana n’Ihuriro AFC/M23 rirwanya ubutegetsi bw’iki Gihugu.
Ababonye ubwo ibi byabaga, bavuga ko aba barwanyi bagaragazaga umujinya w’umuranduranzuzi ubwo bijandikaga muri iki gikorwa bakagihagarika, bazaga bigamba ko ari ab’umutwe wa Wazalendo.
Hari kandi abaturage b’Abanyamulenge bari mu rugendo bagiye gushyingura mu gace ka Kilomoni, bahagaritswe n’abarwanyi ba Wazalendo babafatiye ahitwa Mulongwe babafungirana mu rusengero rwa Communauté des Assemblées de Dieu du Congo (CADC).
Abo muri aka gace kandi bavuga ko bamwe muri abo barwanyi ba Wazalendo banarashe urufaya rw’amasasu menshi mu baturage bari hanze y’urusengero, ndetse hanibwa bimwe mu bikoresho birimo imodoka, telefone, amafaranga ndetse n’ibikoresho by’urusengero.
RADIOTV10
