Perezida wa Senegal, Bassirou Diomaye yakiriye ikipe y’iki Gihugu nyuma yo kwegukana Igikombe cya Afurika, ayigenera ibihembo binyuranye, birimo agashimwe k’ibihumbi 115 by’ama-Euro (Miliyoni 195 Frw), ndetse n’ikibanza kiri ahantu heza i Dakar, kuri buri mukinnyi.
Ni igikorwa cyabaye kuri uyu wa Kabiri tariki 20 Mutarama 2026, cyabimburiwe n’umutambagiro wakozwe n’abakinnyi b’ikipe ya Senegal bakoreye i Dakar mu Murwa Mukuru w’Igihugu, bagiye bagaragarizwa urukundo rwinshi.
Mu bihembo Perezida Bassirou Diomaye yageneye iyi kipe y’Igihugu, birimo ibigenewe muri mukinnyi, buri mukozi w’Ishyirahamwe ry’Umupira w’Amaguru muri kiriya Gihugu cya Senegal, ndetse na buri mukozi wa Minisiteri ya Siporo, bari kumwe n’iyi kipe muri Maroc.
Buri mukinnyi azahembwa €115,000 (Miliyoni 196 Frw) ndetse n’ubutaka bufite ubuso bwa m² 1,500 mu gace kameze neza i Dakar mu murwa mukuru wa Senegal.
Naho buri mukozi w’Ishyirahamwe ry’Umupira w’Amaguru muri Senegal wari kumwe n’ikipe muri iki Gikombe cya Afurika, azahabwa €75,000 (Miliyoni 128 Frw) ndetse n’ubutaka bufite ubuso bwa 1,000 m² na bo muri kariya gace.
Naho €465,000 ndetse n’ibibanza, bizahabwa abakozi bose ba Minisiteri ya Siporo muri Senegal bari baherekeje ikipe y’Igihugu mu Gikombe cya Afurika.
Mu ijambo rye kandi, Perezida Bassirou Diomaye yashimiye byumwihariko umukinnyi Sadio Mane wagaragaje umuhate n’ubutwari, byumwihariko ku mukino wa nyuma w’Igikombe cya Afurika, aho ari we wasubije mu kibuga abakinnyi bari bakivuyemo nyuma yo kutanyurwa n’icyemezo cy’umusifuzi, ibintu byaje gutuma iyi kipe y’Igihugu idaterwa mpaga, bikarangira inegukanye iki Gikombe.
RADIOTV10
