Ku mbuga nkoranyambaga hakomeje gusakazwa amashusho agaragaza umuhanzikazi Celine Dion atitira anarira kubera ububabare bw’indwara ya SPS (Stiff-Person Syndrome) amaranye igihe.
Amashusho agaragaza uyu muhanzi, akomeje gusakazwa ku mbuga nkoranyambaga, yateye impungenge abafana b’uyu muhanzikazi wakanyujijeho
Aya mashusho, ni agace gato kakuwe muri filimi mbarankuru yiswe ‘I Am: Celine Dion’ yo mu 2024. Yongeye kugaragara kuri interineti mu gihe benshi bayirebye bakutse umutima.
Ubwo iyi videwo yakwirakwiraga ku mbuga nkoranyambaga, abafana bagaragaje impungenge ku buzima bw’uyu muririmbyi w’imyaka 57.
Celine Dion yasanzwemo indwara ya Stiff-Person Syndrome (SPS). Ni indwara idasanzwe, ifata mu bwonko no mu ruti rw’umugongo.
Iyi ndwara itera imitsi gukomera cyane no kubabara mu buryo butunguranye bishobora kubaho nta nteguza. Ibi bimenyetso bishobora gutuma kugenda bigorana. Hari igihe bishobora no gutera ubumuga.
Ibimenyetso bishobora guterwa n’imihangayiko, amajwi menshi cyangwa kugenda mu buryo butunguranye.
Ibi bice bishobora gutera kunyeganyega, imitsi igakomera ndetse no kubura imbaraga zo guhagarara. Ku ruhande rwa Celine Dion, afite ingorane zo kugenzura imitsi ikenewe mu kuririmba.
Videwo yakwirakwijwe iragaragaza imbogamizi z’umubiri umuririmbyi w’Umunyakanada ahura na zo kubera iyo ndwara. Nubwo iyi videwo yateye impungenge, abafana benshi bashimye ubutwari bwe.
Gusa bamwe mu bafana ba Celine Dion bavuze ko amashusho nk’ariya atari akwiye kujya hanze, kuko yabateye gukuka umutima no kugira impungenge ku buzima bw’uyu muhanzikazi.
RADIOTV10
