Ubushinjacyaha Bukuru bwa Gisirikare mu Rwanda bwavuze ko hakiri gukorwa iperereza kuri Brig. Gen. Ezechiel Gakwerere wahoze mu buyobozi bwo hejuru bw’umutwe w’iterabwoba wa FDLR uherutse koherezwa mu Rwanda, ku buryo mu gihe kiri imbere ashobora kuzaburanishwa, kandi akazaburanishirizwa mu ruhame.
Brig. Gen. Gakwerere wahoze ari Umunyamabanga Mukuru wa FDLR, yafatiwe muri Repubulika Iharanira Demokarasi ya Congo n’Ihuriro AFC/M23, rimwohereza mu Rwanda muri Werurwe 2025.
Uyu wahoze ari umwe mu bayobozi bakomeye muri FDLR, yahise atangira gukorwaho iperereza n’inzego z’umutekano z’u Rwanda, nk’uko byemejwe n’Umushinjacyaha Mukuru wa Gisirikare, Col. Charles Sumanyi.
Col. Charles Sumanyi, mu kiganiro n’itangazamakuru cyabaye kuri uyu wa Mbere tariki 09 Gashyantare 2025, yavuze ko Brig. Gen. Ezechiel Gakwerere yari afite umwanya wo hejuru muri uriya mutwe w’iterabwoba, ku buryo “afite amakuru menshi ajyanye n’ibikorwa byabo byo mu bihe byashize n’ibiri gukorwa ubu.”
Col. Charles yagize ati “Inzego z’umutekano ziracyakomeza kumubaza ibibazo bimwe na bimwe, mu gihe kitari kirekire kandi kitazwi, igihe kizagera azashyikirizwa ubutabera bwa gisirikare.”
Umushinjacyaha Mukuru w’Ingabo z’u Rwanda, avuga ko imanza za RDF zikunze kubera mu ruhame, ku buryo n’uru rwa Gen, Gakwerere ruzakorwa muri ubu buryo “kandi buri wese ubyifuza azashobora kuzikurikirana.”
Brig. Gen. Gakwerere ni umwe mu bagize uruhare runini muri Jenoside yakorewe Abatutsi, akaba kandi ari umwe mu basirikare boherejwe kwica Umwamikazi Rosalie Gicanda ku itariki 20 Mata 1994.
Uyu wari ufite ipeti rya Lieutenant ubwo Jenoside yakorewe Abatutsi yabaga, anakekwaho kugira uruhare mu rupfu rw’uwahoze ari Perefe w’iyahoze ari Peregegitura ya Butare, Jean-Baptiste Habyarimana.
RADIOTV10
