Minisitiri w’Ingabo, Juvenal Marizamunda n’Umugaba Mukuru wa RDF, Gen. Mubarakh Muganga, bagiranye ibiganiro na Ambasaderi wa Israel mu Rwanda, byagarutse ku kurushaho gushimangira ubufatanye mu bya gisirikare hagati bw’Ibihugu byombi.
Ibi biganiro byabaye kuri uyu wa Gatatu tariki 11 Werurwe 2026 nk’uko byatangajwe na Minisiteri y’Ingabo mu Rwanda, bibera ku cyicaro Gikuru cyayo ku Kimihurura mu Karere ka Gasabo mu Mujyi wa Kigali.
Iyi Minisiteri ivuga ko “Minisitiri w’Ingabo, Juvenal Marizamunda, ari kumwe n’Umugaba Mukuru w’Ingabo z’ u Rwanda, Gen M.K. Mubarakh, bakiriye Nyakubahwa Einat Weiss, Ambasaderi wa Leta ya Isiraheli.”
Ubutumwa bw’iyi Minisiteri bukomeza bugira buti “Bagiranye ibiganiro ku ngingo zifitiye akamaro impande zombi, banasuzuma uburyo bwo kurushaho gushimangira ubufatanye busanzweho mu bya gisirikare hagati y’Ibihugu byombi.”
Igihugu cy’u Rwanda n’icya Israel, bisanganywe umubano n’imikorenire mu nzego zinyuranye zirimo ibirebana n’ibya gisirikare n’umutekano, byumwihariko bishingiye ku gusangira ubunararibonye hagati y’inzobere muri izi nzego.
Muri Mutarama 2020 itsinda ryari ryaturutse muri Israel riyobowe na Brig Gen (Rtd) Yair Kulas ryagiranye ibiganiro n’abayobozi mu buyobozi bukuru bw’Ingabo z’u Rwanda na Polisi.
Uyu wahoze ari Umujenerali mu gisirikare cya Israel, yagaragaje ko ibyo biganiro byari bigamije gushimangira ubufatanye bw’Ibihugu byombi, no gusangizanya inama kuri gahunda zafasha mu kwagura ikoranabuhanga ryafasha ibi Bihugu.
Mu kwezi k’Ugushyingo umwaka ushize kandi, itsinda ry’abantu 14 bahoze mu gisirikare cya Israel biganjemo abamugariye ku rugamba, ryagiriye uruzinduko mu Rwanda, rwari rugamije gukomeza gusangizanya ubunararibonye n’amateka.
RADIOTV10
