Ibihugu 12 bimaze iminsi byibasiwe n’ibitero bya Iran, byashyize hanze itangazo rihuriweho, bisaba iki Gihugu kubihagarika vuba na bwangu, binakibutsa ko bifite uburenganzira bwo kwirwanaho.
Ibi Bihugu, ni Qatar, Azerbaijan, Bahrain, Misiri, Ubwami bwa Jordan, Kuwait, Lebanon, Pakistan, Ubwami bwa Saudi Arabia, Syrian, Turkiye, na Leta Zunze Ubumwe z’abarabu.
Iri tangazo ryashyizwe hanze kuri uyu wa Kane tariki 19 Werurwe 2026 nyuma yuko kuri uyu wa Gatatu tariki 18 Abaminisitiri b’Ububanyi n’Amahanga bateraniye mu nama yiga ku kibazo cy’ibitero bimaze iminsi bigabwaho na Iran yabitangije nyuma yo gushozwaho intambara na Israel na Leta Zunze Ubumwe za America.
Ababitabiriye iyi nama baganiriye ku bitero bya Iran ku Bihugu bigize ‘Gulf Cooperation Council’ Ubwami bwa Hashemite bwa Jordan, Repubulika ya Azerubayijani na Repubulika ya Türkiye.
Bamaganye ikoreshwa rya misile kirimbuzi zizwi nka ballistic ndetse n’iry’indege zitagira abapilote (drones) zibasira ibice by’abaturage n’ibikorwa remezo bya gisivili, harimo ibikorwa remezo by’ibikomoka kuri peteroli, inganda zinyuranye, ibibuga by’indege, inzu zo ndetse n’inyubako zikoreramo za Ambasade.
Bemeje ko ibitero nk’ibi bidashobora kubonerwa ibisobanuro mu bihe ibyo ari byo byose kandi bashimangira ko Ibihugu bifite uburenganzira bwo kwirwanaho hakurikijwe ingingo ya 51 y’Amasezerano y’Umuryango w’Abibumbye.
Aba baminisitiri “basabye Iran guhagarika vuba na bwangu ibitero byayo, kubaha amategeko mpuzamahanga n’amategeko mpuzamahanga y’ubutabazi bw’ikiremwamuntu, no gukurikiza amahame y’ububanyi n’amahanga nk’intambwe ya mbere yo kugabanya ihungabana ry’ubukungu, kongera umutekano n’ituze mu karere, no gukurikira inzira z’ibiganiro bya dipolomasi.”
Bashimangiye ko ahazaza h’umubano w’ibi Bihugu na Iran hazashingira ku kubahiriza ubusugire bw’Igihugu, kutivanga mu bibazo by’imbere mu Gihugu, kwirinda gushotora uturere, no kudakoresha ubushobozi bwa gisirikare mu guhungabanya Ibihugu byo mu karere.
Abari muri iyi nama kandi banasabye Iran guhagarika ibitero byose, kwirinda ibikorwa by’ubushotoranyi cyangwa iterabwoba ku Bihugu by’ibituranyi, no kureka gushyigikira, gutera inkunga no guha intwaro imitwe yitwaje intwaro ifitanye isano mu Bihugu by’Abarabu.
banasabye Iran kwirinda ibikorwa bishobora kubangamira ingendo mpuzamahanga mu nzira ya Hormuz cyangwa guhungabanya umutekano wo mu mazi muri Bab Al Mandeb.
RADIOTV10
