Uwahoze ari umunyezamu w’ikipe y’igihugu ya Cameroun, Joseph-Antoine Bell, yagiriye inama mugenzi we Andre Onana yo kudasubira mu ikipe yo mu Bwongereza ya Manchester United, avuga ko bishobora kutamugirira akamaro.
Onana, ufite amasezerano n’iyi kipe kugeza muri Kamena 2028, ubu ari gukinira ku ntizanyo ikipe yo muri Turukiya ya Trabzonspor kugeza mu mpera z’uyu mwaka w’imikino.
Uyu munyezamu w’imyaka 30 yujuje uyu munsi , akaba yaranyuze mu makipe akomeye arimo Ajax na Inter Milan, ari gutekereza gusubira muri Manchester United, ikipe yafashije kwegukana igikombe cya FA Cup mu 2023.
Icyakora, Joseph-Antoine Bell avuga ko Onana ashobora kuba yakora ikosa aramutse afashe uwo mwanzuro.
Mu kiganiro yagiranye na Africafoot, Bell yavuze ko bidakwiriye ko amakosa yose ikipe yagize yashyirwa kuri Onana wenyine.
Yagize ati: “Nk’uko byavuzwe n’uwahoze atoza Manchester United Ruben Amorim ndetse n’abandi, bashinjaga Onana amakosa yose. Nubwo na we yari afite uruhare nk’abandi bakinnyi bose, kumugira nyirabayazana w’ibibazo by’ikipe byari akarengane.”
Yakomeje avuga ko Onana yafashe icyemezo cyiza cyo kujya gukinira Trabzonspor ku ntizanyo nyuma yo kubona ko atari akiri mu migambi ya Manchester United.
Bell ati: “Kuri Trabzonspor asa n’uwisanzuye kurushaho, ari mu ikipe idafite igitutu kinini cy’itangazamakuru. Mbona biri kumufasha cyane.”
Yongeyeho ko nubwo Onana ashobora kuba yifuza gusubira i Manchester, atabona ko ari cyo cyemezo cyiza kuri we muri iki gihe.
Kuva Onana yagera muri Trabzonspor umwaka ushize, amaze gukina imikino 23 muri uyu mwaka w’imikino, yinjizwamo ibitego 28 ariko agira imikino 6 atinjijwe igitego. Iyi kipe ubu iri ku mwanya wa gatatu muri shampiyona n’amanota 60 mu mikino 27.
Mu mateka ye, Onana amaze gukinira ikipe y’igihugu ya Cameroun inshuro 53, anegukana ibikombe bitandukanye birimo shampiyona eshatu z’u Buholandi ari muri Ajax, Coppa Italia na Supercoppa Italiana ari muri Inter Milan, ndetse n’igikombe cya FA Cup yegukanye ari muri Manchester United.
Yanagize uruhare mu gutuma Cameroun isoza ku mwanya wa gatatu mu gikombe cya Afurika cya 2021 Africa Cup of Nations cyabereye muri Cameroun.
Esca Fifi UWIZERA
RADIOTV10
